গুৱাহাটী:এটা বছৰক বিদায় দি আন এটা বছৰক আদৰিবলৈ সাজু হৈছে সকলো । ইয়াৰ পাছতেই ইতিহাস হৈ পৰিব ২০২৪ চনটো । আৰম্ভ হ'ব ইতিহাস গঢ়াৰ আন এটা নতুন বছৰ । বিভিন্ন ক্ষেত্রৰ লগতে ২০২৪ চনটো অসমৰ ৰাজনীতিৰ বাবে আছিল অত্যন্ত গুৰুত্বপূৰ্ণ বছৰ । বহু ৰাজনৈতিক উত্থান-পতনৰ সাক্ষী হ’ল এই বছৰটো । ৰাজনৈতিক ক্ষেত্রখনত বহু নতুনত্ব দেখা গ'ল বিদায়ী বৰ্ষটোত ।
বিদায়ী বৰ্ষটো বিজেপিৰ বাবে বিশেষ সফলতাৰ বৰ্ষ আছিল । আনহাতে বিৰোধী শিবিৰৰ বাবে বছৰটো আশানুৰূপ নাছিল যদিও কংগ্ৰেছৰ বাবে আশাৰ সঞ্চাৰ কৰা বছৰ আছিল ২০২৪ বৰ্ষটো । নিৰাশাৰ মাজতো আশাৰ কিৰণ দেখিবলৈ সক্ষম হৈছিল কংগ্ৰেছ দলে । বিশেষকৈ লোকসভা নিৰ্বাচনত লাভ কৰা তিনিখন আসনৰ ক্ষেত্রত কংগ্ৰেছৰ এক বিশেষ সফলতা আছিল ।
সমষ্টি পুনৰ নিৰ্ধাৰণৰ পিছত লোকসভা নিৰ্বাচন :
অসমত ২০২৩ বৰ্ষত সমষ্টি পুনৰ নিৰ্ধাৰণ হৈছিল আৰু ২০২৪ বৰ্ষত হৈছিল লোকসভা নিৰ্বাচন । সমষ্টি পুনৰ নিৰ্ধাৰণৰ পাছত অসমত লোকসভা সমষ্টিৰ সংখ্যা পূৰ্বৰ দৰেই ১৪ টা আছিল যদিও সীমাৰ যথেষ্ট সাল-সলনি হৈছিল । সেইদৰে সমষ্টি পুনৰ নিৰ্ধাৰণত ১৯ টা বিধানসভা সমষ্টিৰ লগতে দুটা লোকসভা সমষ্টিৰ নতুন নামাকৰণ হৈছিল । সমষ্টি পুনৰ নিৰ্ধাৰণৰ পাছত প্ৰথমবাৰৰ হোৱা লোকসভা নিৰ্বাচনে বিশেষ তাৎপৰ্য বহন কৰিছিল । লোকসভা নিৰ্বাচনে অসমৰ ৰাজনৈতিক ক্ষেত্রখনক বিভিন্ন ধৰণে যথেষ্ট প্ৰভাৱিত কৰিছিল ।
লোকসভা নিৰ্বাচন আছিল বৰ্ষটোৰ উল্লেখনীয় দিশ :
বিদায়ী বৰ্ষটোত ৰাজনৈতিক ক্ষেত্রখনৰ বাবে উল্লেখনীয় দিশ আছিল লোকসভা নিৰ্বাচন । অসমত তিনিটা পৰ্যায়ত ক্ৰমে ১৯ এপ্ৰিল, ২৬ এপ্ৰিল আৰু ৭ মে' অনুষ্ঠিত হৈছিল লোকসভা নিৰ্বাচন । ১৯ এপ্ৰিলত কাজিৰঙা, শোণিতপুৰ, লখিমপুৰ, ডিব্ৰুগড়, যোৰহাট লোকসভা সমষ্টিত প্ৰথম পৰ্যায়ৰ নিৰ্বাচন অনুষ্ঠিত হৈছিল । সেইদৰে দ্বিতীয় পৰ্যায়ত ২৬ এপ্ৰিলত দৰং-ওদালগুৰি, ডিফু, কৰিমগঞ্জ, শিলচৰ আৰু নগাওঁ লোকসভা সমষ্টিত নিৰ্বাচন অনুষ্ঠিত হৈছিল ।
আনহাতে তৃতীয় পৰ্যায়ত ৭ মে’ত বৰপেটা, ধুবুৰী, গুৱাহাটী আৰু কোকৰাঝাৰ লোকসভা সমষ্টিত নিৰ্বাচন অনুষ্ঠিত হৈছিল । ৪ জুনত হৈছিল ভোটগণনা । ১৪ টা সমষ্টিৰ বাবে নিৰ্বাচনত অৱতীৰ্ণ হৈছিল ১৪৩ গৰাকী প্ৰাৰ্থী । লোকসভা নিৰ্বাচনত অসমত ভোটদানৰ হাৰ আছিল ৮১.৫৬ শতাংশ । সমষ্টি পুনৰ নিৰ্ধাৰণৰ পাছত হোৱা লোকসভা নিৰ্বাচনে যথেষ্ট তাৎপৰ্য বহন কৰিছিল । কাৰণ সমষ্টি পুনৰ নিৰ্ধাৰণৰ পাছত সমষ্টিসমূহৰ ৰূপৰেখা যথেষ্ট সলনি হৈছিল । লোকসভা নিৰ্বাচনত শাসকীয় দল বিজেপি আৰু মিত্রদলে ১১খন আসন লাভ কৰাৰ বিপৰীতে কংগ্ৰেছ দলে তিনিখন আসন লাভ কৰিছিল । বিজেপিয়ে ৯ খন লাভ কৰাৰ লগতে মিত্রদল অগপই এখন আৰু ইউ পি পি এলে এখন আসন লাভ কৰিছিল ।
বছৰটোত সাংসদ হ'ল পাঁচগৰাকীকৈ বিধায়ক :
বিদায়ী বৰ্ষটো পাঁচগৰাকীকৈ বিধায়কৰ বাবে উল্লেখযোগ্য বৰ্ষ আছিল । বৰ্ষটোত তেওঁলোকে ৰাজ্যৰ ৰাজনীতিৰ পৰা সাংসদ হিচাপে দিল্লীলৈ গমন কৰিলে । বৰ্ষটোত হোৱা লোকসভা নিৰ্বাচনত আঠগৰাকীকৈ বিধায়কে প্ৰতিদ্বন্দ্বিতা আগবঢ়াইছিল আৰু জয়ী হৈছিল পাঁচগৰাকী । পুৰণি ধলাই সমষ্টিক প্ৰতিনিধিত্ব কৰা পৰিমল শুক্লবৈদ্যই শিলচৰ লোকসভা সমষ্টিৰ পৰা প্ৰতিদ্বন্দ্বিতা আগবঢ়াই জয়ী হৈছিল । সেইদৰে বঙাইগাঁৱক প্ৰতিনিধিত্ব কৰা অগপৰ ফণীভূষণ চৌধুৰীয়ে বৰপেটা লোকসভা সমষ্টিৰ পৰা নিৰ্বাচনত অৱতীৰ্ণ হৈ জয়ী হৈছিল । সৰভোগক প্ৰতিনিধিত্ব কৰা চি পি আই এমৰ মনোৰঞ্জন তালুকদাৰেও বৰপেটা সমষ্টিত প্ৰতিদ্বন্দ্বিতা আগবঢ়াইছিল যদিও পৰাজিত হয় ।
আনহাতে বিহালীক প্ৰতিনিধিত্ব কৰা ৰঞ্জিত দত্তই শোণিতপুৰৰ পৰা প্ৰতিদ্বন্দ্বিতা আগবঢ়াই জয়ী হৈছিল । ধিঙক প্ৰতিনিধিত্ব কৰা এ আই ইউ ডি এফৰ আমিনুল ইছলামে নগাঁৱৰ পৰা অৱতীৰ্ণ হৈছিল যদিও পৰাজিত হয় । নগাঁৱত জয়ী হয় কংগ্ৰেছৰ প্ৰদ্যুৎ বৰদলৈ । সেইদৰে কলাইগাঁৱক প্ৰতিনিধিত্ব কৰা বি পি এফৰ দুর্গাদাস বড়োৱে দৰং-ওদালগুৰি সমষ্টিৰ পৰা প্ৰতিদ্বন্দ্বিতা আগবঢ়াইছিল যদিও পৰাজিত হয় । চিদলীক প্ৰতিনিধিত্ব কৰা ইউ পি পি এলৰ জয়ন্ত বসুমতাৰীয়ে কোকৰাঝাৰৰ পৰা অৱতীৰ্ণ হৈ জয়ী হয় । আনহাতে চামগুৰিক প্ৰতিনিধিত্ব কৰা কংগ্ৰেছৰ ৰকিবুল হুছেইনে ধুবুৰী সমষ্টিত প্রতিদ্বন্দ্বিতা আগবঢ়াই অভিলেখ ভোটৰ ব্যৱধানত জয়ী হয় ।
পাঁচটা বিধানসভা সমষ্টিৰ উপ-নিৰ্বাচন :
লোকসভা নিৰ্বাচনত পাঁচগৰাকী বিধায়ক জয়ী হৈ সাংসদ হিচাপে দিল্লীলৈ যোৱাৰ পৰিপ্ৰেক্ষিতত ২০২৪ বৰ্ষত পাঁচটা বিধানসভা সমষ্টিত অনুষ্ঠিত হৈছিল উপ-নিৰ্বাচন । উপ-নিৰ্বাচনত পাঁচখন আসনতে বিজেপি আৰু বিজেপিৰ মিত্রদলে বিজয় সাব্যস্ত কৰে । বিজেপিয়ে উপ-নিৰ্বাচন অনুষ্ঠিত হোৱা তিনিটা সমষ্টি ক্ৰমে বিহালী, ধলাই আৰু চামগুৰিত প্ৰতিদ্বন্দ্বিতা আগবঢ়াই জয়ী হয় । আনহাতে বিজেপিৰ মিত্রদল অগপই বঙাইগাঁৱ সমষ্টিত আৰু ইউ পি পি এলে চিদলী সমষ্টিত প্ৰতিদ্বন্দ্বিতা কৰি বিজয় সাব্যস্ত কৰে ।
আনহাতে কংগ্ৰেছ দলে পাঁচটা সমষ্টিতে প্ৰতিদ্বন্দ্বিতা আগবঢ়াই যদিও পৰাজিত হয় । উপ-নিৰ্বাচনত ধলাইৰ পৰা বিজেপিৰ নিহাৰ ৰঞ্জন দাস, বিহালীৰ পৰা বিজেপিৰ দিগন্ত ঘাটোৱাল, বঙাইগাঁৱৰ পৰা অগপৰ দীপ্তিময়ী চৌধুৰী, চিদলীৰ পৰা ইউ পি পি এলৰ নিৰ্মল কুমাৰ ব্ৰহ্ম আৰু চামগুৰিৰ পৰা বিজেপিৰ দিপ্লু ৰঞ্জন শৰ্মা জয়ী হয় । লক্ষণীয় বিষয় যে কংগ্ৰেছৰ শক্তিশালী নেতা তথা সাংসদ ৰকিবুল হুছেইনৰ দুৰ্গ হিচাপে পৰিচিত চামগুৰি সমষ্টিত বিজেপিৰ দিপ্লু ৰঞ্জন শৰ্মাই বিজয় ধ্বজা উৰুৱাবলৈ সক্ষম হয় । সমষ্টিটোত কংগ্ৰেছৰ প্ৰাৰ্থী তথা ৰকিবুল হুছেইনৰ পুত্র তানজিল হুছেইন পৰাজিত হয় ।
একমাত্র কংগ্ৰেছৰ বাবে বিদায়ী বৰ্ষটোত বিঘ্নিত হ'ল বিৰোধী ঐক্য :
বিজেপিক প্ৰতিহত কৰাৰ বাবে ২০২৩ বৰ্ষত বিৰোধী শক্তি ঐক্যবদ্ধ হৈছিল যদিও ২০২৪ বৰ্ষত কংগ্ৰেছৰ বাবে বিঘ্নিত হ'ল । কংগ্ৰেছৰ নেতৃত্বত ১৫ টাকৈ বিৰোধী ৰাজনৈতিক দল ঐক্যবদ্ধ হৈ গঠন কৰিছিল বিৰোধী ঐক্য মঞ্চ । পৰৱৰ্তী সময়ত ২০২৪ বৰ্ষৰ ৫ অক্টোবৰত বিৰোধী ঐক্য মঞ্চৰ নাম সলনি কৰি 'অসম সন্মিলিত মৰ্চা' চমুকৈ 'অসম' কৰা হয় । ২০২৩ বৰ্ষত ৰাজনৈতিক ক্ষেত্রখনত বিশেষভাৱে চৰ্চাত থকা বিৰোধী ঐক্য লোকসভা নিৰ্বাচনৰ সময়তে বিঘ্নিত হয় । কংগ্ৰেছ দলে লোকসভাৰ ১৪খন আসনৰ ভিতৰত ১৩খনত নিজৰ প্ৰাৰ্থী দিয়াৰ বিপৰীতে একমাত্র ডিব্ৰুগড় আসনখন মিত্রদল অসম জাতীয় পৰিষদৰ সভাপতি লুৰীণজ্যোতি গগৈক এৰি দিছিল ।
বিৰোধী ঐক্যত থকা আন দলক আসন এৰি নিদিয়াত আম আদমী পাৰ্টী, তৃণমূল কংগ্ৰেছ, চি পি আই এম, চি পি আই আদি মিত্রদলে মিত্রতাৰ বিপৰীতে নিজাকৈ প্ৰাৰ্থী দিছিল । কাৰ্যতঃ বিৰোধী ঐক্য নামতেহে আছিল লোকসভা নিৰ্বাচনত । কিন্তু উপ-নিৰ্বাচনৰ সময়ত একপ্ৰকাৰ সম্পূৰ্ণ ৰূপে বিঘ্নিত হয় বিৰোধী ঐক্য । কংগ্ৰেছ দলে আঁকোৰগোজ স্থিতি লৈ উপ-নিৰ্বাচনত পাঁচখন আসনতে নিজৰ প্ৰাৰ্থী দিয়াত ক্ষোভিত হৈ পৰিছিল বিৰোধী ঐক্যৰ দলসমূহ ।
অসম সন্মিলিত মৰ্চাৰ দলসমূহে একমাত্র বিহালী সমষ্টিটো কংগ্ৰেছৰ পৰা বিচাৰিছিল । চি পি আই এম এলৰ নেতা বিবেক দাসক অসম সন্মিলিত মৰ্চাই বিহালীৰ পৰা প্ৰাৰ্থী হিচাপে থিয় কৰাব বিচাৰিছিল । কিন্তু কংগ্ৰেছ দলে বিৰোধী দলসমূহক বিশ্বাসঘাতকতা কৰি জয়ন্ত বৰাক নিশাৰ ভিতৰতে বিহালীৰ প্ৰাৰ্থী হিচাপে প্ৰক্ষেপ কৰে । যিজন জয়ন্ত বৰাই বিজেপি ত্যাগ কৰি আহিছিল আৰু কংগ্ৰেছত যোগদান কৰাৰ পূৰ্বেই কংগ্ৰেছৰ হৈ বিহালীৰ পৰা টিকট লাভ কৰিছিল ।
কংগ্ৰেছৰ এনে স্থিতিত ক্ষোভিত হৈ অসম সন্মিলিত মৰ্চাই কংগ্ৰেছক মৰ্চাৰ পৰা আঁতৰ কৰি দিয়ে । কংগ্ৰেছক আঁতৰ কৰি সাংসদ অজিত কুমাৰ ভূঞাক অসম সন্মিলিত মঞ্চৰ সভাপতিৰ দায়িত্ব অৰ্পন কৰা হয় । বৰ্তমান কংগ্ৰেছ অবিহনে আছে অসম সন্মিলিত মৰ্চা । অৱশ্যে ২০২৬ৰ বিধানসভা নিৰ্বাচনৰ পূৰ্বে বিৰোধী ঐক্য ৰূপৰেখা পুনৰ সলনি হোৱাৰ সম্ভাৱনা আছে । পুনৰ কংগ্ৰেছ অন্তৰ্ভুক্ত হোৱাৰ সম্ভাৱনা প্ৰৱল ।
আঞ্চলিক ৰাজনৈতিক দলৰ উমৈহতীয়া মঞ্চ :
বিদায়ী বৰ্ষটোৰ ৰাজনৈতিক ক্ষেত্রৰ আন এক উল্লেখনীয় দিশ আছিল আঞ্চলিকতাবাদী ৰাজনৈতিক শক্তিৰ উমৈহতীয়া মঞ্চ গঠন । ৰাজ্যৰ লগতে উত্তৰ-পূবৰ আঞ্চলিকতাবাদী ৰাজনৈতিক শক্তিক ঐক্যবদ্ধ কৰাৰ লক্ষ্যৰে জাতীয় দল অসম, ৰাইজৰ দল, অসম জাতীয় পৰিষদ আৰু অল পিপ’ল হিল লীডাৰ্ছ কনফাৰেন্সৰ উদ্যোগত ২০২৪ গঠন কৰা হয় ‘অসম আঞ্চলিক মৰ্চা’ । গুৱাহাটীত হোৱা কেইবাখনো বৈঠকৰ পাছত এই মৰ্চা গঠন কৰা হয় । চাৰিটা দলৰ সভাপতিক আহ্বায়ক আৰু ভাস্কো ডি শইকীয়াক সমন্বয়ক হিচাপে লৈ এখন সমিতি গঠন কৰা হয় ।
এ আই ইউ ডি এফৰ সভাপতি বদৰুদ্দিন আজমলৰ পৰাজয় :
২০২৪ বৰ্ষটো এ আই ইউ ডি এফৰ বাবে আছিল বিফলতাৰ বৰ্ষ । বিশেষকৈ এ আই ইউ ডি এফৰ সভাপতি বদৰুদ্দিন আজমলে বৰ্ষটোত বিশাল পৰাজয়ৰ সন্মূখীন হ'বলগীয়া হয় । বছৰটোত সংসদত শূন্য হ'ল এ আই ইউ ডি এফ । লোকসভা নিৰ্বাচনত পৰাজিত হ'ল ধুবুৰীৰ তিনিবাৰৰ সাংসদ বদৰুদ্দিন আজমল । অভিলেখ ভোটৰ ব্যৱধানত পৰাজিত হ'বলগীয়া হ'ল বদৰুদ্দিন আজমল । এখন আসনেৰে সংসদীয় ৰাজনীতিত থকা এ আই ইউ ডি এফ দলে সেইখনো হেৰুৱাব লগা হ'ল ।