গুৱাহাটী, 31 মাৰ্চ : লোকসভা নিৰ্বাচনৰ পৰিপ্ৰেক্ষিতত বৰ্তমানলৈ ৰাজ্যৰ থানাই থানাই জমা হৈছে 12 হাজাৰৰো অধিক মাৰণাস্ত্ৰ ৷ উল্লেখ্য যে, নিৰ্বাচনৰ পূৰ্বে অনুজ্ঞাপত্ৰ থকা মাৰণাস্ত্ৰসমূহ জমা লোৱাটো এটা স্বাভাৱিক প্ৰক্ৰিয়া ৷ তাৰেই অংশস্বৰূপে স্বচ্ছ, নিকা আৰু ভয়মুক্ত লোকসভা নিৰ্বাচন অনুষ্ঠিত কৰিবলৈ তৎপৰ হৈ পৰিছে নিৰ্বাচন আয়োগ ৷ নিৰ্বাচন আয়োগে জাৰি কৰা নিৰ্দেশনাৰ পিচতেই লোকসভাৰ নিৰ্বাচনৰ প্ৰাকমুহূৰ্তত ৰাজ্যৰ থানাই থানাই বৈধ মাৰাণাস্ত্ৰ সমূহ জমা কৰাৰ প্ৰক্ৰিয়া অব্যাহত আছে ৷
এইপৰ্যন্ত ৰাজ্যৰ থানাসমূহত 12,392 টা মাৰণাস্ত্ৰ জমা হৈছে ৷ ইফালে গুৱাহাটী মহানগৰীৰ থানাসমূহত এতিয়ালৈকে 12,000 টা মাৰণাস্ত্ৰ জমা হৈছে ৷ নিৰ্বাচনৰ সময়ত যাতে বন্দুকৰ প্ৰভাৱ তথা ভয়-ভাবুকি নাথাকে আৰু স্বচ্ছ-নিকাভাৱে নিৰ্বাচন অনুষ্ঠিত হয় তাৰ প্ৰতি লক্ষ্য ৰাখি নিৰ্বাচন আয়োগে অনুজ্ঞাপত্ৰ থকা বন্দুক, পিষ্টল আদি মাৰণাস্ত্ৰ সংশ্লিষ্ট সকলৰ পৰা জমা ল'বলৈ অসম আৰক্ষীক নিৰ্দেশ জাৰি কৰিছিল ৷ নিৰ্বাচন আয়োগৰ নিৰ্দেশৰ ভিত্তিতেই অসম আৰক্ষীয়ে ৰাজ্যৰ সকলো থানাৰ ভাৰপ্ৰাপ্ত বিষয়াক বৈধ মাৰণাস্ত্ৰসমূহ জমা ল'বলৈ নিৰ্দেশ জাৰি কৰে ৷
তদুপৰি অসম আৰক্ষীয়ে মাৰণাস্ত্ৰৰ অনুজ্ঞাপত্ৰ থকা লোকৰ নাম আৰু ঠিকনাসহ তালিকা ৰাজ্যৰ প্ৰতিখন থানালৈ প্ৰেৰণ কৰে ৷ এই তালিকাৰ ভিত্তিত আৰক্ষীয়ে কিছু বৈধ মাৰণাস্ত্ৰ সংগ্ৰহ কৰিবলৈ সক্ষম হৈছে ৷ জানিব পৰা মতে এতিয়াও বুজন পৰিমাণৰ মাৰণাস্ত্ৰ জমা হোৱা নাই ৷ অৱশ্যে বৈধ মাৰণাস্ত্ৰ সমূহ সংগ্ৰহ কৰিবলৈ অসম আৰক্ষীয়ে যুদ্ধকালীন তৎপৰতাৰে অভিযান চলাই আছে ৷ নিৰ্বাচন অনুষ্ঠিত হোৱাৰ পূৰ্বেই বাহিৰত থকা বৈধ মাৰণাস্ত্ৰ সমূহ নিজৰ অধীনলৈ অনাৰ বাবে আৰক্ষীয়ে অভিযান চলাই আছে ৷
ইফালে নিৰ্বাচন আয়োগে গ্ৰেপ্তাৰী পৰোৱানা জাৰি হোৱা অপৰাধীক গ্ৰেপ্তাৰ কৰিবলৈ অসম আৰক্ষীক নিৰ্দেশনা জাৰি কৰিছে ৷ নিৰ্বাচন আয়োগৰ নিৰ্দেশ মৰ্মে পূৰ্বৰ অপৰাধমূলক গোচৰৰ 1,261 গৰাকী অভিযুক্তৰ বিৰুদ্ধে অসম আৰক্ষীয়ে জাৰি কৰিছে জামিনবিহীন গ্ৰেপ্তাৰী পৰোৱানা ৷ এনে একাংশ অভিযুক্তক আৰক্ষীয়ে গ্ৰেপ্তাৰ কৰিছে যদিও আন একাংশই আকৌ গ্ৰেপ্তাৰৰ পৰা হাত সাৰিবলৈ আত্মগোপন কৰিছে ৷ আনহাতে কামৰূপ মহানগৰ জিলা প্ৰশাসনে জাৰি কৰা নিৰ্দেশমৰ্মে গুৱাহাটীৰ থানাসমূহত এতিয়ালৈকে জমা হৈছে 1,200 ৰো অধিক অনুজ্ঞাপত্ৰ থকা আগ্নেয়াস্ত্ৰ ৷ উল্লেখ্য যে কামৰূপ মহানগৰ জিলা প্ৰশাসনে গুৱাহাটী মহানগৰীত প্ৰদান কৰা আগ্নেয়াস্ত্ৰৰ অনুজ্ঞাপত্ৰৰ সংখ্যা হৈছে 1,418 টা ৷
লগতে পঢ়ক :ডিব্ৰুগড়ত গাড়ী ডিলাৰৰ প্ৰৱঞ্চনাৰ বলি গ্ৰাহক - Fraud In Dibrugarh
