নগাঁৱৰ তিনি লক্ষাধিক লোক বানত আক্ৰান্ত, বন্যাৰ্তৰ কাষত মন্ত্ৰী অতুল বৰা - Assam Flood 2024

Nagaon Flood Situation : মুখ্যমন্ত্ৰীৰ নিৰ্দেশৰ পাচতেই বান পৰিস্থিতিৰ বুজ লবলৈ নগাঁৱত উপস্থিত মন্ত্ৰী অতুল বৰা ৷ জিলা প্ৰশাসন, জলসম্পদ বিভাগৰ সৈতে পৰ্যালোচনা বৈঠকত অংশ লয় মন্ত্ৰীগৰাকীয়ে ৷ বানত ক্ষতিগ্ৰস্ত সকলোকে সাহায্য প্ৰদানৰ আশ্বাস মন্ত্ৰী অতুল বৰাৰ। নগাঁৱৰ তিনি লক্ষাধিক লোক বানত আক্ৰান্ত । কাজিৰঙা ৰাষ্ট্ৰীয় উদ্যানৰ জীৱ-জন্তুৰ বাবে কৰা হৈছে পহৰাৰ ব্যৱস্থা । মন্তব্য মন্ত্ৰী অতুল বৰাৰ ।

নগাঁও, 4 জুলাই :বছৰৰ দ্বিতীয়টো বানে বিভীষিকাৰ সৃষ্টি কৰা নগাঁৱৰ বান পৰিস্থিতিৰ বুজ লবলৈ বৃহস্পতিবাৰে নগাঁৱত উপস্থিত হয় ৰাজ্যৰ কৃষি মন্ত্ৰী অতুল বৰা ৷ মুখ্যমন্ত্ৰী ড৹ হিমন্ত বিশ্ব শৰ্মাৰ নিৰ্দেশৰ পাচতেই বৃহস্পতিবাৰে নগাঁৱত উপস্থিত হৈ জিলা প্ৰশাসন, জলসম্পদ বিভাগৰ সৈতে এক পৰ্যালোচনা বৈঠকত মিলিত হয় মন্ত্ৰী অতুল বৰা ৷ জিলা প্ৰশাসনৰ সৈতে পৰ্যালোচনা বৈঠকত অংশগ্ৰহণৰ অন্তত সংবাদ মাধ্যমক সম্বোধন কৰি নগাঁৱৰ বানপীড়িতৰ তথ্য দাঙি ধৰে মন্ত্ৰীগৰাকীয়ে ৷

মন্ত্ৰী অতুল বৰাই দিয়া তথ্য অনুসৰি বছৰৰ প্ৰথমটো বানত জিলাখনৰ 3,64,000 লোক আক্ৰান্ত হোৱাৰ লগতে দ্বিতীয়টো বানত নগাঁৱৰ 34 হাজাৰ লোক আক্ৰান্ত হৈছে ৷ প্ৰথমটো বানত নগাঁৱৰ 139 খন গাঁও আক্ৰান্ত হোৱাৰ লগতে 88 খন গাঁও দ্বিতীয়টো বানত আক্ৰান্ত হৈছে ৷ একেদৰে, প্ৰথমটো বানত জিলাখনৰ 14,933 টা পশুধন বানৰ কবলত পৰাৰ লগতে দ্বিতীয়টো বানত জিলাখনৰ 25,987 টা পশুধন বানত আক্ৰান্ত হৈছে ৷ জিলাখনৰ 3,999 হেক্টৰ কৃষিভূমি বছৰৰ প্ৰথমটো বানত প্লাৱিত হোৱাৰ উপৰিও দ্বিতীয়টো বানত প্লাৱিত হৈছে জিলাখনৰ 2,531 হেক্টৰ কৃষিভূমি ৷

লগতে পঢ়ক :তেজপুৰত বন্যহস্তী আৰু ম'হৰ সন্ত্ৰাস, সষ্টম বন বিভাগ - Assam Flood 2024

বানত আক্ৰান্ত লোকৰ বাবে জিলাখনত প্ৰথম আৰু দ্বিতীয়টো বানত মুঠ 226 টা শিবিৰ স্থাপন কৰি সাহায্য প্ৰদানৰ তথ্যও দাঙি ধৰে মন্ত্ৰী অতুল বৰাই ৷ নগাঁও জিলাৰ বিভিন্ন অঞ্চল বানৰ কৱলত পৰাৰ সময়ত দুজন ব্যক্তি বিদ্যুৎস্পৃষ্ট হৈ মৃত্যু হোৱা বুলি উল্লেখ কৰে মন্ত্ৰীগৰাকীয়ে ৷ ইফালে, বিশ্ব ঐতিহ্য কাজিৰঙা ৰাষ্ট্ৰীয় উদ্যানৰ মুঠ 159 টা বন শিবিৰৰ আটাইকেইটাই জলমগ্ন হোৱা বুলিও উল্লেখ কৰে মন্ত্ৰী অতুল বৰাই ৷ কাজিৰঙা ৰাষ্ট্ৰীয় উদ্যানৰ জীৱ-জন্তুৰ আশ্ৰয়ৰ বাবে ৰাষ্ট্ৰীয় উদ্যানখনত পৰ্যাপ্ত ওখ ভেটি থকাৰ কথা মন্ত্ৰীগৰাকীয়ে জানিবলৈ দিয়ে ৷ আনকি বহু জীৱ-জন্তু ৰাষ্ট্ৰীয় উদ্যানখনৰ দাঁতিকাষৰীয়া পাহাৰীয়া এলেকাত আশ্ৰয় লোৱাৰ কথাও উল্লেখ কৰে তেওঁ ৷ আনকি কাজিৰঙা ৰাষ্ট্ৰীয় উদ্যানৰ জীৱকুলৰ সৰক্ষাৰ বাবে পৰ্যাপ্ত নিৰাপত্তাৰ ব্যৱস্থা গঢ়ি পহৰাৰ ব্যৱস্থা কৰা বুলি সংবাদ মাধ্যমৰ আগত জানিবলৈ দিয়ে মন্ত্ৰী অতুল বৰাই ৷

লগতে পঢ়ক :বানাক্ৰান্তৰ কাষত মুখ্যমন্ত্ৰী-মন্ত্ৰী-কেন্দ্ৰীয় মন্ত্ৰী : সকলো দিশত চকু ৰখাৰ ইংগিত - Assam Flood 2024