গুৱাহাটী, ১৪ জুন :মহানগৰ আৰক্ষীৰ সফলতা । ৬৫০ টা চুৰি ম'বাইলৰ লগতে ১৬ টা চুৰি লেপটপ উদ্ধাৰ কৰিবলৈ সক্ষম হৈছে মহানগৰ আৰক্ষী । গুৱাহাটীৰ বিভিন্ন স্থানৰ পৰা বিগত সময়ত চুৰি হোৱা ৬৫০ টা ম'বাইলৰ লগতে ১৬ টা লেপটপ মহানগৰ আৰক্ষীয়ে উদ্ধাৰ কৰিছে । সম্প্রতি এই ম'বাইল আৰু লেপটপ মহানগৰখনৰ থানাই থানাই মজুত হৈ আছে ।
উপযুক্ত নথি-পত্ৰৰ অভাৱত আৰক্ষীয়ে ম'বাইল, লেপটপ গৰাকীক গতাব পৰা নাই । সেয়ে শুকুৰবাৰে দিনৰ ১১ বজাত গুৱাহাটীৰ পাণবজাৰস্থিত মহানগৰ আৰক্ষী আয়ুক্তৰ কাৰ্যালয়ত এইসমূহ চুৰি ম'বাইল, লেপটপ প্রদর্শন কৰা হ'ব । এই কথা প্রকাশ কৰে মহানগৰ আৰক্ষী আয়ুক্ত দিগন্ত বৰাই । আৰক্ষী আয়ুক্তগৰাকীয়ে জনোৱা অনুসৰি গৰাকীয়ে উপযুক্ত প্রমাণ দি নিজৰ ম'বাইল লেপটপ আৰক্ষী আয়ুক্তৰ কাৰ্যালয়ৰ পৰা সংগ্ৰহ কৰিব পাৰিব ।
উল্লেখ্য যে, বিগত সময়চোৱাত গুৱাহাটীত চিলনী চোৰৰ লগতে আন বহু আবাসিক অঞ্চলৰ পৰা চোৰে ম'বাইল-লেপটপ আদি চোৰ কৰি সন্ত্রাসৰ সৃষ্টি কৰিছে । দিন দুপৰতে চলাইছে লুটপাত । মহানগৰীত সঘনাই সংঘটিত হোৱা এনেবোৰ ঘটনাৰ বিৰুদ্ধে ইতিমধ্যে ভুক্তভোগীয়ে নিজৰ নিজৰ এলেকাৰ থানাত এই সন্দর্ভত দাখিল কৰিছে এজাহাৰ ।