গোলাঘাট, ১৪ আগষ্ট: অসম-নাগালেণ্ডৰ সীমান্তৱৰ্তী মেৰাপানীত বেদখলৰ বিৰুদ্ধে মঙলবাৰে গোলাঘাট জিলা প্ৰশাসনে উচ্ছেদ চলায় ৷ মেৰাপানী আৰক্ষী থানা আৰু পশু চিকিৎসালয়ৰ সন্মুখভাগত চৰকাৰী ভূমিত অবৈধভাৱে গঢ় লৈ উঠা দোকানসমূহ উচ্ছেদ কৰে গোলাঘাট জিলা প্ৰশাসনে । শেহতীয়াকৈ একাংশ বেদখলকাৰীয়ে চৰকাৰী ভূমিত অবৈধভাৱে দোকান-ঘৰ নিৰ্মাণ কৰি মেৰাপানীৰ পৰিবেশ বিনষ্ট কৰি আহিছিল । একাংশ বেদখলকাৰীয়ে আনকি মেৰাপানী পশু চিকিৎসালয়ৰ প্ৰবেশ পথটোও বেদখল কৰি একপ্ৰকাৰ বন্ধ কৰি দিছিল ।
মেৰাপানীত প্ৰশাসনৰ উচ্ছেদ অভিযান (ETV Bharat Assam) যাৰ পৰিপ্ৰেক্ষিতত মঙলবাৰে গোলাঘাট জিলা প্ৰশাসনে দণ্ডাধীশৰ নেতৃত্বত আৰক্ষী আৰু চি আৰ পি এফৰ দল মোতায়েন কৰি অবৈধ ব্যৱসায়িক প্ৰতিষ্ঠান আৰু বাসগৃহসমূহ উচ্ছেদ কৰে । উচ্ছেদস্থলীত যাতে কোনো অপ্ৰীতিকৰ পৰিস্থিতি উদ্ভৱ নহয়, তাৰ প্ৰতি লক্ষ্য ৰাখি কটকটীয়া নিৰাপত্তাৰ ব্যৱস্থা কৰা হয় ।
এই উচ্ছেদ অভিযানৰ নেতৃত্ব দিয়া দণ্ডাধীশগৰাকীয়ে কয়, "অসম চৰকাৰে অসম মালা আঁচনিৰ জৰিয়তে গোলাঘাট মেৰাপানী পথছোৱা নিৰ্মাণ কৰি থকা হৈছে ৷ যাৰ বাবে মেৰাপানী আৰক্ষী থানাৰ ক্ষুদ্ৰ প্ৰাথমিক চিকিৎসালয়লৈকে এই উচ্ছেদ অভিযান চলোৱা হ’ব ৷ তদুপৰি সীমান্তৱৰ্তী অঞ্চলটোৰ বিভিন্ন প্ৰান্তৰ লগতে চুবুৰীয়া ৰাজ্য নাগালেণ্ডৰ পৰা হাজাৰ হাজাৰ লোক ইয়ালৈ ব্যৱসায়িক কাৰণ আহে ৷ যাৰ ফলত অঞ্চলটোত তীব্ৰ যানজঁটৰ সমস্যা হোৱা পৰিলক্ষিত হয় আৰু ইয়াৰ ফলত ৰোগী কঢ়িয়াই অনা এম্বুলেন্স আদি অহা-যোৱাৰ ক্ষেত্ৰত সমস্যাৰ সৃষ্টি হয় ৷
লগতে পঢ়ক:মাছমৰীয়াৰ বিৰুদ্ধে কঠোৰ লাওখোৱাৰ বন বিভাগ বেদখলকাৰীৰ বিৰুদ্ধে কিয় নীৰৱ ? - Laokhowa Wildlife Sanctuary
তেওঁ লগতে কয়, "এই উচ্ছেদ অভিযানৰ পাছত পথছোৱা বহল কৰাৰ ফলত যানজঁটৰ সমস্যা বহু পৰিমাণে হ্ৰাস পাব বুলি আশা কৰা হৈছে । ইয়াৰ উপৰিও এই অঞ্চলত বিজ্ঞানসন্মতভাৱে এটা নলা নিৰ্মাণ কৰা হ'ব, যাৰ দ্বাৰা ভবিষ্যতে মেৰাপানী অঞ্চলত কৃত্ৰিম বানৰ সমস্যাৰ পৰাও ৰক্ষা পৰিব ৷"
উক্ত অঞ্চলটোত বাসগৃহ আৰু দোকান গৃহ নিৰ্মাণ কৰা লোকৰ সৈতে জুলাই মাহত এক আলোচনাত মিলিত হৈ যাৱতীয় নথি-পত্ৰ দেখুৱাবলৈ কোৱা হৈছিল যদিও তেওঁলোকে কোনোধৰণৰ নথি পত্ৰ দেখুৱাবলৈ সক্ষম হোৱা নাছিল বুলি দণ্ডাধীশগৰাকীয়ে জানিবলৈ দিয়ে ৷ অৱশ্যে কেইজনমান লোকে কিছু নথি-পত্ৰ দেখুৱাইছে আৰু প্ৰশাসনৰ লোকে এই নথি-পত্ৰসমূহ পৰীক্ষণ কৰি সেই অনুসৰি উচ্ছেদ অভিযান আগবঢ়াই নিব বুলি তেওঁ ব্যক্ত কৰে ৷
দণ্ডাধীশগৰাকীয়ে কয়, "এই অঞ্চলটো এটা বিবদমান এলেকা আৰু বিবদমান এলেকাত বাসগৃহ বা দোকান নিৰ্মাণ কৰিবলৈ সীমান্ত দণ্ডাধীশৰ অনুমতি ল'ব লাগে ৷ কিন্তু এই লোকসকলে কোনোধৰণৰ অনুমতি নোলোৱাকৈ অবৈধভাৱে নিৰ্মাণ কৰিছিল । অবৈধভাৱে দখল কৰি বাসগৃহ আৰু ব্যৱসায়িক প্ৰতিষ্ঠান নিৰ্মাণ কৰি থকা লোকসকলক প্ৰশাসনে আঁতৰি যাবলৈ কৈ আহিছিল যদিও তেওঁলোকে কোনোধৰণৰ গুৰুত্ব আৰোপ কৰা নাছিল ৷ যাৰ বাবে আজি এই উচ্ছেদ অভিযান চলোৱা হৈছে ৷"
লগতে পঢ়ক:লংকাত ৰে’ল বিভাগৰ উচ্ছেদ অভিযান - Railway land encroachment
