গুৱাহাটী, ১৭মাৰ্চ: আৰক্ষী-নিৰাপত্তাৰক্ষীয়ে গিজগিজাই থকা ৰাজধানী গুৱাহাটী মহানগৰীত পুনৰ যুৱতী নিৰুদ্দেশৰ ঘটনা সংঘটিত হৈছে । এইবাৰ গীতানগৰৰ গুৰুকুল গ্ৰামাৰ স্কুলৰ সমীপৰ পৰা নিৰুদ্দিষ্ট হৈছে দুগৰাকী যুৱতী । যোৱা শনিবাৰৰ নিশাৰ পৰা সন্ধানহীন হৈ থকা যুৱতী দুগৰাকীৰ বাতৰি লিখাৰ পৰলৈ কোনো শুংসূত্ৰ লাভ কৰিবলৈ সক্ষম হোৱা নাই আৰক্ষীয়ে ।
ইতিমধ্য়ে এই ঘটনা সন্দৰ্ভত যুৱতী দুগৰাকীৰ পৰিয়ালৰ লোকে নুনমাটি আৰক্ষী থানাত দাখিল কৰা এজাহাৰৰ ভিত্তিত আৰক্ষীয়ে এটা গোচৰ ৰুজু কৰি তদন্ত প্ৰক্ৰিয়া আৰম্ভ কৰিছে । ইতিমধ্যে আৰক্ষীয়ে দুগৰাকী যুৱতীৰ এগৰাকীৰ সৈতে থকা মোবাইল ফোনৰ লোকেচন ট্ৰেছ কৰি পশ্চিমবংগৰ আলিপুৰদুৱাৰত যুৱতী দুগৰাকীৰ অৱস্থিতি ধৰা পেলাইছে । পাৰিয়ালৰ লোকে নিৰুদ্দিষ্ট যুৱতী দুগৰাকী কোনো দুষ্ট চক্ৰৰ কৱলত পৰাৰ সন্দেহ প্ৰকাশ কৰিছে । ইয়াৰ বিপৰীতে যুৱতী দুগৰাকী প্ৰেমিকৰ সৈতে পলাই যোৱাৰ সন্দেহ প্ৰকাশ কৰিছে আৰক্ষীয়ে ।
আৰক্ষীৰ পৰা লাভ কৰা তথ্য অনুসৰি দুয়োগৰাকী যুৱতীয়ে দুজন যুৱকৰ সৈতে ইনষ্টাগ্ৰামযোগে গঢ়ি তুলিছিল প্ৰেমৰ সম্পৰ্ক । বিগত দুবছৰ ধৰি ইনষ্টাগ্ৰামযোগে যুৱতী দুগৰাকীৰ সৈতে চিনাকি হোৱা যুৱক দুজনৰ সৈতে চলি আছিল প্ৰেমৰ সম্পৰ্ক । সেই সুবাদতে প্ৰেমিকৰ সৈতে যুৱতী দুগৰাকী পলাই যোৱাৰ সন্দেহ প্ৰকাশ কৰিছে নুনমাটি আৰক্ষীয়ে ।
ইফালে, নিৰুদ্দিষ্ট যুৱতী দুগৰাকীৰ সন্ধান নোপোৱাত উদ্বিগ্ন হৈ পৰিছে পৰিয়ালৰ লোক । মন কৰিবলগীয়া কথা এই যে চলিত বৰ্ষৰ ১৪ ফেব্ৰুৱাৰী অৰ্থাৎ সৰস্বতী পূজাৰ দিনা নুনমাটি অঞ্চলৰ পৰা দুগৰাকী ছাত্ৰী নিৰুদ্দিষ্ট হৈছিল । পিছত মানৱ সৰবৰাহকাৰীৰ জালত পৰা ছাত্ৰী দুগৰাকীক কোনো মতে আৰক্ষীয়ে উদ্ধাৰ কৰিবলৈ সক্ষম হৈছিল । সেয়ে গীতা নগৰ অঞ্চলৰ পৰা নিৰুদ্দিষ্ট হোৱা যুৱতী দুগৰাকীও এনে দুষ্ট চক্ৰৰ কবলত পৰিব পাৰে নেকী তাক লৈ এতিয়া চৰ্চা চলিছে একাংশ লোকৰ মাজত।
লগতে পঢ়ক:মহানগৰীৰ নুনমাটিৰ পৰা নিৰুদ্দিষ্ট দুই ছাত্ৰীক উদ্ধাৰ টিহুত
