ডিব্ৰুগড়,৩ অক্টোবৰ: নাহৰৰ দেশত উৰিল পদ্মনাথ গোহাঞি বৰুৱা ছাত্ৰ নিৱাসৰ পতাকা । স্নাতকোত্তৰ মহলা ছাত্ৰ একতা সভাৰ নিৰ্বাচনত চৰম বিপৰ্যৰ সন্মুখীন সদৌ অসম ছাত্ৰ সন্থা । বিগত বৰ্ষসমূহত ডিব্ৰুগড় বিশ্ববিদ্যালয়ৰ ছাত্ৰ একতা সভা সদৌ অসম ছাত্ৰ সন্থাৰ দখলত আছিল যদিও এইবাৰ ছাত্ৰ-ছাত্ৰীৰ ভোট নপৰিল আছুৰ সপক্ষে ।
বৃহস্পতিবাৰে উজনি অসমৰ উচ্চ শিক্ষাৰ প্ৰাণকেন্দ্ৰ ডিব্ৰুগড় বিশ্ববিদ্যালয়ত অনুষ্ঠিত হয় স্নাতকোত্তৰ মহলাৰ ছাত্ৰ একতা সভাৰ নিৰ্বাচন । স্নাতকোত্তৰ মহলা ছাত্ৰ একতা সভাৰ নিৰ্বাচনক লৈ বৃহস্পতিবাৰৰ পুৱাৰে পৰা উৎসৱমুখৰ পৰিবেশে বিৰাজ কৰিছিল নাহৰৰ দেশত । পুৱাৰ ভাগৰে পৰা অনুষ্ঠিত হয় ডিব্ৰুগড় বিশ্ববিদ্যালয়ৰ নিৰ্বাচনৰ ভোটগ্ৰহণ প্ৰক্ৰিয়া । ডিব্ৰুগড় বিশ্ববিদ্যালয়ৰ স্নাতকোত্তৰ ছাত্ৰ একতা সভাত ১৮ টা পদ আছিল যদিও ১৪ টা পদৰ বাবে অনুষ্ঠিত হয় নিৰ্বাচন। ছাত্ৰ একতা সভাৰ ১৮টা পদৰ ৪ টা পদত বিনা প্ৰতিদ্বন্দ্বিতাৰে চাৰিগৰাকী প্ৰাৰ্থী বিজয়ী হোৱাত ১৪ টা পদৰ বাবে অনুষ্ঠিত হয় নিৰ্বাচন ।
১৪ টা পদৰ বিপৰীতে মুঠ ২৯ গৰাকী প্ৰাৰ্থীয়ে ভোটযুদ্ধত অৱতীৰ্ণ হয় । সন্ধিয়া পৰ্যন্ত হোৱা ভোট গণনাত বিশ্ববিদ্যালয়ৰ ঐতিহ্যমণ্ডিত পদ্মনাথ গোহাঞি বৰুৱা ছাত্ৰ নিৱাসৰ সমৰ্থিত প্ৰাৰ্থী সভাপতি-সম্পাদককে ধৰি প্ৰায়বোৰ পদতে জয়লাভ কৰে । ঐতিহ্যমণ্ডিত পদ্মনাথ গোহাঞি বৰুৱা ছাত্ৰ নিৱাসৰ হৈ প্ৰতিদ্বন্দ্বিতা কৰি সভাপতি পদত যুগল কিশোৰ গগৈ আৰু সাধাৰণ সম্পাদকৰ পদত লেনিশ মিলিয়ে জয়লাভ কৰে । ফলাফল ঘোষণাৰ পাছতে গীত-নৃত্যৰে বিজয় উৎসৱ অনুষ্ঠিত কৰে ছাত্ৰ-ছাত্ৰীসকলে ।
জয়লাভ কৰি কি কয় নৱ-নিৰ্বাচিত সভাপতি যুগল কিশোৰ গগৈয়ে:
"জয়লাভ কৰি যথেষ্ট সুখী হৈছো । আগৰে পৰা বিশ্ববিদ্যালয়ৰ বাবে কাম কৰি আহিছিলো । এতিয়া সভাপতিৰ দায়িত্ব লাভ কৰি ডিব্ৰুগড় বিশ্ববিদ্যালয়ক বিশ্ব পৰ্যায়ত যাতে জিলিকাই তুলিব পাৰো তাৰ বাবে কাম কৰি যাম । ডিব্ৰুগড় বিশ্ববিদ্যালয়ৰ বিভিন্ন সমস্যা আছে বিশেষকৈ নিৰাপত্তা ব্যৱস্থা শক্তিশালী কৰাৰ বাবে আমি প্ৰথমে কাম কৰিম ।"