ধিং,১৯ জুলাই:ৰাজ্যজুৰি সৃষ্টি হোৱা বান বিভীষিকাই মৰিগাঁও জিলাৰ বিভিন্ন প্ৰান্তৰ লগতে চৰ অঞ্চলতো বিস্তৰ ক্ষতিসাধন কৰে । শুকুৰবাৰে বান-বিধ্বস্ত চৰবাসীৰ কাষত উপস্থিত হয় মৰিগাঁও জিলা আয়ুক্ত দেৱাশীষ শৰ্মা । দুৰ্যোগৰ সময়ত চৰবাসীক আয়ুক্ত শৰ্মাই নিজাববীয়াকৈ কিছু খাদ্য সামগ্ৰী বিতৰণ কৰে । আয়ুক্তগৰাকীৰ এনে মহানুভৱতাই লাভ কৰিছে বিশেষ চর্চা । এইবাৰৰ বানত চিতলমাৰী, ৰংৰাচাপৰি, গৰৈমাৰী আৰু ভজাইখাটি চৰ আটাইতকৈ বেছি ক্ষতিগ্ৰস্ত হৈছে ।
এই জলপ্ৰলয়ৰ সময়ত ব্ৰহ্মপুত্ৰৰ মাজৰ ওখ ভেটিত পোহনীয়া জীৱ-জন্তুৰ সৈতে ৰ'দে- বৰষুণে সহৱস্থান কৰিবলগীয়া হৈছে চৰৰ বন্যার্তই । এনে এক পৰিস্থিতিত এই দুর্গত বন্যাৰ্তৰ কাষত থিয় হৈ কণ কণ ল'ৰা-ছোৱালীক কিছু পৰিমাণে খাদ্যসামগ্ৰী বিতৰণ কৰি, মানৱ দৰদী জিলা আয়ুক্ত গৰাকীয়ে দাঙি ধৰিলে মানৱ সেৱাৰ নিদৰ্শন । সাহাৰ্য-সামগ্ৰীৰ সৈতে যন্ত্ৰচালিত নাৱেৰে আয়ুক্তগৰাকীয়ে চৰত আশ্ৰয় লৈ থকা বানাক্ৰান্ত চৰবাসীক খাদ্যসামগ্ৰী বিতৰণ কৰে ।
উল্লেখযোগ্য যে আয়ুক্ত দেৱাশীষ শৰ্মাই খাদ্যসামগ্ৰী বিতৰণ কৰাৰ লগতে চৰত বানে নষ্ট কৰা সা-সম্পত্তিৰ ক্ষয়-ক্ষতিৰ বুজ লয় । বৰ্তমান চৰত পানী শুকাবলৈ ধৰিছে যদিও চৰ-চাপৰিৰ লোকসকলৰ অৱস্থা অতি শোচনীয় হৈ আছে । এইবাৰৰ বানে মৰিগাঁও জিলাৰ অৰ্থনীতিত বিৰূপ প্ৰভাৱ পেলাব । কিয়নো চৰৰ শাক-পাচলি, মৰাপাট, মাকৈ খেতি আদি শস্যৰ ওপৰত মৰিগাঁও জিলাৰ অৰ্থনীতি বহু পৰিমাণে নিৰ্ভৰ কৰে ।