যোৰহাট :অসম জাতীয়তাবাদী যুৱ ছাত্ৰ পৰিষদৰ দক্ষিণ পশ্চিম আঞ্চলিকৰ অষ্টম দ্বি বাৰ্ষিক অধিৱেশনৰ যোৱা দেওবাৰে সামৰণি পৰে । দুদিনীয়াকৈ আয়োজিত এই অধিৱেশনৰ অন্তিম দিনা ঢোলৰ ওজা মহেন্দ্ৰ চুতীয়াক "বৰেণ্য শিল্পী" বঁটা কৰা হয় । একেটা অনুষ্ঠানতেই কণ্ঠশিল্পী প্ৰাণদ্বীপ হাজৰিকাক "যুৱ নক্ষত্ৰ" বঁটা প্ৰদান কৰে অসম জাতীয়তাবাদী যুৱ ছাত্ৰ পৰিষদৰ দক্ষিণ পশ্চিম আঞ্চলিক সমিতিয়ে ।
অসম জাতীয়তাবাদী যুৱ ছাত্ৰ পৰিষদৰ দক্ষিণ পশ্চিম আঞ্চলিকৰ অষ্টম দ্বি বাৰ্ষিক অধিৱেশন যোৰহাটৰ ধলাজানত অনুষ্ঠিত হয় । প্ৰথম দিনা এই অনুষ্ঠানত পতাকা উত্তোলনৰ পিছতেই প্ৰতিনিধি সভাৰ উদ্বোধন কৰে কেন্দ্ৰীয় সমিতিৰ প্ৰচাৰ সম্পাদক অসীমজ্যোতি শইকীয়াই ।
দ্বিতীয় দিনাৰ কাৰ্যসূচীৰ শুভ উদ্বোধন কৰে ধলাজান অঞ্চলৰ ক্ৰীড়া সংগঠক তথা টেকেলা গাঁও উচ্চ মাধ্যমিক বিদ্যালয়ৰ অৱসৰপ্ৰাপ্ত প্ৰধান শিক্ষক দেৱেন দত্তই । ইয়াৰ পিছতেই ধলাজান খেলপথাৰত যোৰহাট জিলা ক্ৰীড়া সন্থাৰ পঞ্জীয়নভুক্ত চাৰিটা মহিলা ফুটবল দলৰ মাজত প্ৰতিযোগিতা অনুষ্ঠিত হয় । এই প্ৰতিযোগিতাত জংঘল ব্লক ক'চিং চেন্টাৰে কাকজান ক'চিং চেন্টাৰক ২-১ গ'লৰ ব্য়ৱধানত পৰাজিত কৰি প্ৰতিযোগিতাখনৰ খিতাপ লাভ কৰিবলৈ সক্ষম হয় ।
এই অনুষ্ঠানৰ বঁটা বিতৰণি সভাত সভাপতিত্ব কৰে অসম জাতীয়তাবাদী যুৱ ছাত্ৰ পৰিষদৰ যোৰহাট জিলাৰ সাংগঠনিক সম্পাদক প্ৰাঞ্জল দাসে । সভাখনত কেন্দ্ৰীয় সমিতিৰ সহকাৰী সম্পাদক শিৱ কলিতা, কেন্দ্ৰীয় কাৰ্যনিৰ্বাহক নৱ বৰা, যোৰহাট জিলা ক্ৰীড়া সন্থাৰ সম্পাদক জুল খাউণ্ডৰ লগতে ৰাষ্ট্ৰীয় পুৰস্কাৰ প্ৰাপ্ত শিক্ষক যোগেন দত্ত উপস্থিত থাকে । সভাত বিজয়ী আৰু বিজিত দলক ট্ৰফী আৰু মানপত্ৰ প্ৰদান কৰা হয় ।