জ্বলি যোৱা মৃতদেহৰ পৰিচয় উদ্ধাৰ
তিনিচুকীয়া, 26 এপ্ৰিল :15 এপ্ৰিলৰ পুৱা তিনিচুকীয়া জিলাৰ কচুজানৰ শুকানপুখুৰী চাহ বাগিচাত উদ্ধাৰ হৈছিল এটা জ্বলাই দিয়া মৃতদেহ ৷ এই ঘটনাই অঞ্চলজুৰি সৃষ্টি কৰিছিল তীব্ৰ চাঞ্চল্যৰ ৷ পৰৱৰ্তী সময়ত আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে যদিও ওলোৱা নাছিল কোনো সম্ভেদ ৷
কিন্তু উদ্ধাৰৰ 10 দিনৰ পিচত ওলাল মৃতদেহৰ পৰিচয় ৷ মৃত লোকজনৰ পৰিয়ালৰ লোক তিনিচুকীয়া সদৰ আৰক্ষী থানাত উপস্থিত হৈ চিনাক্ত কৰে মৃতদেহ ৷ মৃতদেহটো শিৱসাগ জিলাৰ বকতাৰ 21 বছৰীয়া যুৱক ৰাজ লাচিতৰ বুলি চিনাক্ত কৰিছে পৰিয়ালৰ লোকে ৷ 10 দিন ধৰি সন্ধানহীন হৈ আছিল যুৱকজন ৷ যুৱকজনৰ সন্ধানত পৰিয়ালৰ লোক তিনিচুকীয়া সদৰ আৰক্ষী থানাত উপস্থিত হৈ 15 এপ্ৰিলত শুকানপুখুৰী চাহ বাগিচাত উদ্ধাৰ হোৱা মৃতদেহটোৰ ফটো চাই সেয়া ৰাজ লাচিত বুলি চিনাক্ত কৰে ৷