গুৱাহাটী, ২০ জুলাই: ইউনেস্কোৰ বিশ্ব ঐতিহ্য সমিতিৰ ৪৬ সংখ্যক সভা ২১ জুলাইৰ পৰা ৩১ জুলাইলৈ নতুন দিল্লীৰ ভাৰত মণ্ডপমত অনুষ্ঠিত হ'ব । ভাৰত আয়োজক দেশ হিচাপে থকা এই গুৰুত্বপূৰ্ণ সভাত ১৯৫খন দেশৰ দুহেজাৰতকৈও অধিক ঐতিহ্য সমল বিশেষজ্ঞই অংশগ্ৰহণ কৰিব । উক্ত সভাত ভাৰতকে ধৰি বিশ্বৰ বিভিন্ন দেশৰ মূল্যৱান সাংস্কৃতিক ঐতিহ্য সমূহৰ সংৰক্ষণ আৰু প্ৰসাৰৰ ক্ষেত্ৰত এই বিশেষজ্ঞ সকলে নিজস্ব দৃষ্টিভংগী দাঙি ধৰিব । প্ৰধানমন্ত্ৰী নৰেন্দ্ৰ মোদীয়ে ২১ জুলাইৰ সন্ধিয়া উদ্বোধন কৰিবলগা সভাখনত অধ্যক্ষতা কৰিব ভাৰত বিশাল শৰ্মাই ।
গুৰুত্ব লাভ কৰিব অসমৰ চৰাইদেউ মৈদামে:
দেওবাৰে হ’বলগীয়া এই সভাত অসমৰ চৰাইদেউ মৈদাম ক্ষেত্রক ইউনেস্কোৰ বিশ্ব ঐতিহ্য ক্ষেত্রৰ তালিকাত স্থান প্ৰদানৰ বিষয়টিয়েও আলোচনাত বিবেচনাৰ সম্ভাৱনা আছে । কাইলৈ নতুন দিল্লীত অনুষ্ঠিতব্য বিশ্ব সংস্থাটোৰ এই গুৰুত্বপূৰ্ণ বৈঠকত ৰাজ্যৰ সাংস্কৃতিক পৰিক্ৰমা, উদ্যোগ, বাণিজ্য আৰু ৰাজহুৱা প্ৰতিষ্ঠান বিভাগৰ মন্ত্রী বিমল বড়ায়ো অংশগ্ৰহণ কৰিব । ইউনেস্কোৰ শীর্ষ বিষয়াসকলৰ উপস্থিতিত চৰাইদেউৰ বিষয়টোৱে গুৰুত্ব লাভ কৰাৰ সম্ভাৱনা আছে । ইয়াতেই বহু আকাংক্ষিত চৰাইদেৱে বিশ্ব ঐতিহ্য ক্ষেত্ৰৰ তালিকাত স্থান লাভৰ কথাটোৱে এঢাপ আগুৱাই যোৱাৰ সম্ভাৱনা আছে ।