নতুন দিল্লী :অসমৰ বিদেশী সমস্যা এক জ্বলন্ত সমস্যা, ইয়াত কাৰো দ্বিমত নাই । আনহাতে, অসমত অনুপ্ৰৱেশৰ সমস্যা, অবৈধ বিদেশী চিনাক্ত আৰু বিতাড়নৰ বাবে নিৰ্দিষ্ট ব্যৱস্থা আছে । ইয়াৰ বাবে আছে বিদেশী ন্যায়াধিকৰণ । এই ন্যায়াধিকৰণৰ জৰিয়তে অবৈধ বিদেশীক চিনাক্ত কৰা হয় । পৰৱৰ্তী সময়ত চিনাক্ত বিদেশীক বিতাড়নৰ দায়িত্ব চৰকাৰৰ ।
কিন্তু অসম চৰকাৰে চিনাক্ত বিদেশীক বিতাড়নৰ ক্ষেত্ৰত কি ব্যৱস্থা গ্ৰহণ কৰিছে । বিদেশী বিতাড়নৰ ক্ষেত্ৰত কিমান সক্ৰিয় ৰাজ্য চৰকাৰ ? সঁচাকৈয়ে ৰাজ্য চৰকাৰৰ বিদেশী বিতাড়নৰ ক্ষেত্ৰত সদিচ্ছা আছেনে ? এই বিষয়বোৰ স্পষ্ট হৈ পৰিছে দেশৰ শীৰ্ষ ন্যায়ালয়ৰ এক পৰ্যবেক্ষণত ।
ৰাজ্য চৰকাৰে বিদেশী বিতাড়নৰ ক্ষেত্ৰত গ্ৰহণ কৰা ভূমিকাক লৈ ক্ষুণ্ণ হৈ পৰিছে উচ্চতম ন্যায়ালয় । কেৱল সেয়াই নহয়, এইক্ষেত্ৰত চৰকাৰক তীব্ৰ সমালোচনাও কৰে দেশৰ শীৰ্ষ ন্যায়ালয়ে । যাৰ বাবে মঙলবাৰে উচ্চতম ন্যায়ালয়ে ৰাজ্য চৰকাৰক প্ৰশ্ন কৰিবলৈ বাধ্য হৈছে , "আপোনালোকে শুভ মহুৰতৰ বাবে অপেক্ষা কৰি আছে নেকি ?" লগতে বিদেশী হিচাপে ঘোষণা কৰা লোকসকলক বিতাড়ন কৰাৰ পৰিৱৰ্তে অনিৰ্দিষ্ট কালৰ বাবে ডিটেনচন চেণ্টাৰত ৰখাৰ বাবে অসম চৰকাৰক তীব্ৰ সমালোচনা কৰে ।
ন্যায়াধীশ অভয় এছ ওকা আৰু উজ্জ্বল ভূঞাৰ বিচাৰপীঠে কয় যে আটকাধীন লোকসকলক এবাৰ যদি বিদেশী বুলি ঘোষণা কৰা হয়, তেন্তে তেওঁলোকক তৎক্ষণাৎ বিতাড়ন কৰা উচিত ।