গুৱাহাটী, ২৩ জুলাই :বিগত পাঁচ বছৰত অসমত বানপানীৰ ফলত মুঠ 847 টা বন্যপ্ৰাণী ক্ষতিগ্ৰস্ত হৈছে । ইয়াৰে ভিতৰত 511 টা বন্যপ্ৰাণীৰ মৃত্যু হোৱা বুলি জানিব পৰা গৈছে । কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰী কীৰ্তি বৰ্ধন সিঙে এই তথ্য প্ৰদান কৰিছে । তেওঁ কয় যে বিগত পাঁচ বছৰত অসমত হোৱা বানপানীত ৫১১ টা জন্তুৰ মৃত্যুৰ খবৰ পোৱা গৈছে ।
তেওঁ কয়, "অসম চৰকাৰৰ পৰা পোৱা তথ্য অনুসৰি, বিগত পাঁচ বছৰত অসমত মুঠ ৮৪৭ টা বন্যপ্ৰাণী বানপানীৰ ফলত ক্ষতিগ্ৰস্ত হৈছিল । ইয়াৰে ভিতৰত ৩৩৬ টা বন্যজন্তুক সফলতাৰে উদ্ধাৰ কৰা হয় আৰু ৫১১ টা মৃত্যু হোৱাৰ খবৰ পোৱা গৈছে ।"
কেন্দ্ৰীয় মন্ত্ৰীগৰাকীয়ে লগতে কয় যে বানপানীৰ সময়ত বন্যপ্ৰাণীৰ সুৰক্ষা আৰু সংৰক্ষণৰ বাবে অসম চৰকাৰে কেতবোৰ পদক্ষেপ গ্ৰহণ কৰিছে । এই পদক্ষেপসমূহৰ ভিতৰত আছে বানপানীৰ সময়ত বন্যপ্ৰাণী সুৰক্ষা আৰু সংৰক্ষণৰ বিষয়ে সজাগ কৰিবলৈ প্ৰান্তীয় অঞ্চলৰ বাসিন্দাসকলৰ সৈতে সজাগতা অভিযান আৰু বৈঠক ।
তদুপৰি, তেওঁ কয় যে বন্যপ্ৰাণী বনাঞ্চলৰ পৰা ওলাই জনাঞ্চললৈ বিপথগামী হোৱাৰ ক্ষেত্ৰত গাঁওবোৰত লাউডস্পীকাৰেৰে ঘোষণা কৰা হয় । আনহাতে, কাজিৰঙা ৰাষ্ট্ৰীয় উদ্যানত টহল দিবলৈ আৰু বান সম্পৰ্কীয় দায়িত্ব পালন কৰিবলৈ নিকটৱৰ্তী বিভাগৰ অতিৰিক্ত বন কৰ্মচাৰী নিয়োজিত কৰা হয় । লগতে তেওঁলোকে যান-বাহনৰ সংঘৰ্ষৰ ফলত জন্তুৰ মৃত্যু প্ৰতিহত কৰিবলৈ এছিয়ান হাইৱে 1 (ৰাষ্ট্ৰীয় ঘাইপথ-37)ত বাহনৰ গতি নিৰীক্ষণ কৰে ।
"গোলাঘাট, নগাঁও আৰু কাৰ্বি আংলং জিলাত আৰক্ষী বিভাগৰ অতিৰিক্ত নিৰাপত্তা বাহিনী মোতায়েন কৰা হৈছে । তেওঁলোকে বনকৰ্মীসকলক চোৰাং চিকাৰবিৰোধী কৰ্তব্যত সহায় কৰে আৰু বানপানীৰ সময়ত মানৱ-বন্যপ্ৰাণী সংঘাত হ্ৰাস কৰাত সহায় কৰে । নগাঁও আৰু গোলাঘাট জিলাৰ পৰিবহণ বিষয়া আৰু মটৰ পৰিবহণ পৰিদৰ্শকসকলে বোকাখাতৰ পৰা জখলাবন্ধালৈ এছিয়ান হাইৱে ১ (ৰাষ্ট্ৰীয় ঘাইপথ-৩৭)ত বাহনৰ গতি নিয়ন্ত্ৰণ কৰে । এই পথটো কাজিৰঙা ৰাষ্ট্ৰীয় উদ্যানৰ কাষেৰে পাৰ হৈ গৈছে ।" কেন্দ্ৰীয় মন্ত্ৰীগৰাকীয়ে কয় ।
তেওঁ লগতে কয়, "বেচৰকাৰী সংগঠন আৰু গাঁও সুৰক্ষা দলৰ স্বেচ্ছাসেৱকসকলে পশুৰ গতিবিধি নিৰীক্ষণ কৰে আৰু এছিয়ান হাইৱে ১ (ৰাষ্ট্ৰীয় ঘাইপথ-৩৭)ত বাহনৰ গতি হ্ৰাস কৰাত সহায় কৰে । বানপানীৰ সময়ত বন্যজন্তুৰ বাবে ওখ আশ্ৰয়স্থল প্ৰদান কৰাৰ বাবে 33 টা নতুন ওখ এলেকা আৰু পথ তথা ওখ ভূমি এলেকা সৃষ্টি কৰা হৈছে । অসুৰক্ষিত এলেকাবোৰ বেৰিকেড কৰা হৈছে । বানপানীৰ সময়ত বন্যজন্তুৰ সুৰক্ষিত চলাচল নিশ্চিত কৰিবলৈ গধুৰ বাহনসমূহক নিশাৰ ভাগত এছিয়ান হাইৱে 1 (ৰাষ্ট্ৰীয় ঘাইপথ-37) ব্যৱহাৰ কৰাটো নিষিদ্ধ কৰা হৈছে ।"
তেওঁ লগতে কয় যে বানপানীৰ সময়ত উদ্যানখনৰ ভিতৰত নিয়মীয়া নিৰীক্ষণ আৰু টহল অব্যাহত ৰখাৰ বাবে চোৰাং চিকাৰবিৰোধী শিবিৰসমূহ দেশীয় নাৱেৰে সজ্জিত । "প্ৰতিটো বনাঞ্চলিকত মোবাইল, ৱায়াৰলেছ ছেট, ট্ৰেফিক ৱাণ্ডছ আৰু ফ্লেছলাইটেৰে সজ্জিত এক জৰুৰীকালীন সঁহাৰি দল থাকে । এই দলবোৰে যান-বাহনৰ যাতায়াত নিয়ন্ত্ৰণ কৰে আৰু উদ্যানখনৰ বাহিৰৰ ওখ স্থানলৈ বন্যপ্ৰাণী প্ৰব্ৰজনৰ সুবিধা কৰি দিয়ে । বানপানীৰ স্তৰ নিৰীক্ষণ কৰিবলৈ সকলো বনাঞ্চলিক কাৰ্যালয় আৰু বোকাখাতৰ সংমণ্ডল কাৰ্যালয়ত এটা বান নিৰীক্ষণ কোষ আৰু নিয়ন্ত্ৰণ কক্ষ স্থাপন কৰা হয় ।" কীৰ্তি বৰ্ধন সিঙে কয় ।
কেন্দ্ৰীয় মন্ত্ৰীগৰাকীয়ে কয় যে জলস্তৰ মূল্যাঙ্কন কৰিবলৈ কেন্দ্ৰীয় জল আয়োগৰ সমৰ্থনত ধনশিৰিমুখ আৰু দিফলুমুখত বানৰ স্তৰ মাপক স্কেল স্থাপন কৰা হৈছে । "পশুৰ চলাচল নিৰীক্ষণ আৰু সেই অনুসৰি বাহনৰ চলাচল নিয়ন্ত্ৰণ কৰিবলৈ ছয়টা স্থানত পশু সংবেদক ব্যৱস্থা স্থাপন কৰা হৈছে আৰু কাৰ্বি আংলং পাহাৰত ড্ৰোণৰ জৰিয়তে পশুৰ গতিবিধি ট্ৰেচ কৰা হৈছে ।" তেওঁ কয় ।
"বন্যজন্তু উদ্ধাৰ অভিযানৰ সময়ত অতিৰিক্ত সহায় আগবঢ়াবলৈ আৰু উদ্যানখনৰ ভিতৰত বনকৰ্মীৰ সুৰক্ষা নিশ্চিত কৰিবলৈ ৰাজ্যিক দুৰ্যোগ সঁহাৰি বাহিনী মোতায়েন কৰা হৈছে । প্লাৱিত আৰু ক্ষতিগ্ৰস্ত শিবিৰৰ কৰ্মচাৰীসকলক সুৰক্ষিত অঞ্চললৈ স্থানান্তৰিত কৰা হয় আৰু উদ্যানখনৰ পৰিসৰত টহল দিয়াত নিয়োজিত কৰা হয় । প্ৰব্ৰজনৰ সময়ত বন্যপ্ৰাণীৰ সুৰক্ষা নিশ্চিত কৰাৰ বাবে বন্যপ্ৰাণীয়ে সঘনাই অহা অসুৰক্ষিত স্থানত অস্থায়ী শিবিৰ স্থাপন কৰা হয় ।" কেন্দ্ৰীয় মন্ত্ৰীগৰাকীয়ে লগতে কয় ।
উল্লেখ্য যে কাজিৰঙা ৰাষ্ট্ৰীয় উদ্যান কৰ্তৃপক্ষৰ মতে, ৰাষ্ট্ৰীয় উদ্যানখনত এই বছৰৰ বানত ১৩ টা এশিঙীয়া গঁড়সহ ২১৫ টা বন্যপ্ৰাণীৰ মৃত্যু হয় ।
