টেষ্ট মেচৰ পূৰ্বে বৃহৎ প্ৰত্যাহ্বান: আঘাতৰ বাবে বাহিৰ বিধ্বংসী বেটছমেন - NZ VS AFG

Ibrahim Zadran injury: ক্ৰিকেটৰ পথাৰত খেলুৱৈসকলৰ আঘাত প্ৰায়ে হৈ পৰে সমস্যাৰ বিষয় । ইয়াৰ প্ৰভাৱ পৰে খেলখনৰ প্ৰদৰ্শনৰ ওপৰত । সোমবাৰৰ পৰা নয়দাত আৰম্ভ হোৱা টেষ্ট মেচৰ পূৰ্বে একেধৰণৰ এক ঘটনা ঘটিছে এটা দলৰ সৈতে । পঢ়ক বিতং খবৰ...

স্প’ৰ্টছ ডেস্ক, 9 ছেপ্টেম্বৰ: গ্ৰেটাৰ নয়দাৰ শ্বহীদ বিজয় সিং পথিক স্প’ৰ্টছ কমপ্লেক্স গ্ৰাউণ্ডত সোমবাৰৰে পৰা অনুষ্ঠিত হ’বলগীয়া একমাত্ৰ টেষ্ট মেচত মুখামুখি হ’ব আফগানিস্তান আৰু নিউজিলেণ্ড ৷

পিছে মেচখনৰ পূৰ্বে বৃহৎ প্ৰত্যাহ্বানৰ সন্মুখীন হৈছে আফগানিস্তান ৷ দলটোৰ অন্যতম শীৰ্ষ বেটছমেন ইব্ৰাহিম জাদৰানৰ আঘাতৰ বাবে মেচত অংশ নোলোৱাটো নিশ্চিত হৈ পৰিছে ৷ ইতিমধ্যে দক্ষিণ আফ্ৰিকাৰ বিৰুদ্ধেও শৃংখলাৰ পৰাও বাহিৰ হৈছে ক্ৰিকেটাৰগৰাকী ৷

ভৰিৰ আঘাতৰ বাবে বাহিৰ ইব্ৰাহিম জাদৰান

আফগানিস্তানে নিজৰ অফিচিয়েল এক্স একাউণ্টৰ জৰিয়তে ৰাজহুৱা কৰিছে এই খবৰ ৷ দলটোৱে "আঘাতৰ আপডেট, আফগানিস্তানৰ সৰ্বশ্ৰেষ্ঠ টপ অৰ্ডাৰ বেটছমেন ইব্ৰাহিম জাদৰানক আগন্তুক এখন আফগানিস্তান বনাম নিউজিলেণ্ড টেষ্ট আৰু 3 খন মেচৰ আফগানিস্তান বনাম দক্ষিণ আফ্ৰিকা এদিনীয়া শৃংখলাৰ পৰা বাওঁ গোৰোহা মোচোকা হোৱাৰ বাবে বাহিৰ কৰা হৈছে । সোনকালে সুস্থ হওক, ইব্ৰাহিম" বুলি এক্সত প্ৰকাশ কৰিছিল ৷

জাদৰানৰ বাওঁভৰিত পোৱা আঘাতৰ বাবে নিউজিলেণ্ডৰ বিৰুদ্ধে অনুষ্ঠিত হ’বলগীয়া টেষ্ট মেচৰ পূৰ্বে দলৰ পৰা বাদ পৰে ৷ যি খবৰ নিউজিলেণ্ডৰ বাবে এক সকাহ হোৱাৰ বিপৰীতে আফগানিস্তানৰ বাবে বিপদঘণ্টা হিচাপে প্ৰমাণিত হ'ব পাৰে ।

জাদৰানে টেষ্টত কেনে প্ৰদৰ্শন কৰিছে

ইব্ৰাহিম জাদৰানে এতিয়ালৈকে আফগানিস্তানৰ হৈ মুঠ 7 খন টেষ্ট মেচ খেলিছে । ক্ৰিকেটাৰগৰাকীয়ে 14 টা ইনিংছত 38.6 গড় আৰু 47.0 ষ্ট্ৰাইক ৰেটৰ সৈতে এটা শতক আৰু 4 টা অৰ্ধ-শতকৰ সহায়ত সংগ্ৰহ কৰিছে মুঠ 541 ৰাণ । খেলুৱৈগৰাকীয়ে বৰ্তমানলৈকে কোবাইছে 64 টা চাৰি আৰু 4 টা ছয় ৷

লগতে পঢ়ক:ভাৰত-বাংলাদেশৰ প্ৰথম টেষ্টৰ বাবে ভাৰতীয় দল ঘোষণা, বাদ পৰিল কেবাগৰাকীও খেলুৱৈ - INDIA vs BANGLADESH test series