স্প’ৰ্টছ ডেস্ক, 2 জুলাই :টি 20 বিশ্বকাপত ভাৰতে খিতাপ দখল কৰাৰ পিছত দৰ্শক তথা অনুৰাগীৰ দৃষ্টি আৱদ্ধ হৈছে যুৱ ক্ৰিকেটাৰৰে গঠিত জিম্বাব’ৱে অভিমুখে যাত্ৰা কৰা ভাৰতীয় দলটোৰ ওপৰত ৷ নতুন আৰু যুৱ খেলুৱৈৰে গঠিত দলটোৱে 6 জুলাইৰ পৰা জিম্বাব’ৱেৰ বিৰুদ্ধে অনুষ্ঠিত হ’বলগীয়া টি 20 মেচৰ শৃংখলাত ভাগ ল’ব ৷
এই শৃংখলাটো প্ৰতিগৰাকী ভাৰতীয়ৰ লগতে সমানে গুৰুত্বপূৰ্ণ প্ৰতিগৰাকী অসমীয়াৰ বাবে ৷ কিয়নো এইখন বিমানতে উঠি জিম্বাব’ৱে অভিমুখে যাত্ৰা কৰিছে অসম সন্তান তথা ৰঞ্জি দলৰ অধিনায়ক ৰিয়ান পৰাগ ৷ ৰিয়ানে এই শৃংখলাৰ জৰিয়তে আন্তৰাষ্ট্ৰীয় ক্ৰিকেটত প্ৰৱেশ কৰিব ৷ যি ক্ষণৰ বাবে আশাৰে বাট চাইছে প্ৰতিগৰাকী অসমীয়াই ৷
প্ৰাক্তন ভাৰতীয় ক্ৰিকেট তাৰকা ভি ভি এছ লক্ষ্মণ এই দলটোৰ প্ৰশিক্ষকৰ দায়িত্বত আছে ৷ পাঁচখনকৈ টি-20 মেচৰ এই শৃংখলাটো 6-14 জুলাইলৈ হাৰাৰে স্পৰ্টছ ক্লাবত অনুষ্ঠিত হ'ব ৷ বিচিচিআয়ে সামাজিক মাধ্যম এক্সৰ জৰিয়তে প্ৰশিক্ষক আৰু খেলুৱৈসকলৰ কেইবাখনো ফটো ইতিমধ্যে শ্বেয়াৰ কৰিছে ৷
লগতে পঢ়ক:তীব্ৰ উৎকণ্ঠাৰ অৱসান; চাৰ্টাৰ্ড বিমানেৰে উভতিব ভাৰতীয় দল - Indian team stuck in Barbados
জিম্বাব’ৱে চতুৰ্থবাৰৰ বাবে ভাৰতীয় ক্ৰিকেট দলৰ সৈতে টি-20 শৃংখলাত মুখামুখি হ’ব ৷ ইয়াৰ পূৰ্বে দলটোৱে ভাৰতৰ বিৰুদ্ধে 2010, 2015 আৰু 2016 চনত টি 20 শৃংখলাত অংশগ্ৰহণ কৰিছিল ৷ ভাৰতীয় দলটোৰ নেতৃত্ব প্ৰদান কৰা হৈছে উদীয়মান ক্ৰিকেটাৰ শুভমন গিলক ৷