অটল সেঁতুৰ পৰা জপিয়াই মহিলাৰ আত্মহত্যাৰ চেষ্টা, আৰক্ষীয়ে ৰক্ষা কৰিলে প্ৰাণ...আত্মহত্যাৰ ঘটনা কেনেকৈ ৰোধ কৰিব পাৰি ? - How To Prevent Suicide

How To prevent suicide: ভাৰতত আত্মহত্যাৰ ঘটনা ক্ৰমাগতভাৱে বৃদ্ধি পাইছে, এনে পৰিস্থিতিত আমাৰ চৌপাশে এনে সম্ভাব্য ঘটনা ৰোধৰ বাবে পদক্ষেপ গ্ৰহণ কৰাটো এজন সচেতন নাগৰিক হিচাপে আমাৰ দায়িত্ব ।

শুকুৰবাৰে সন্ধিয়া প্ৰায় ৭ বজাত মহাৰাষ্ট্ৰত সংঘটিত হয় এটি ঘটনা ৷ নৱী মুম্বাইৰ অটল সেতুৰ পৰা জপিওৱাৰ চেষ্টা চলাইছিল এগৰাকী মহিলাই ৷ আত্মহত্যাৰ চেষ্টা চলোৱা মহিলাগৰাকীক কেব চালক আৰু যান-বাহন আৰক্ষীয়ে একেলগে মিলি কথমপি প্ৰাণ ৰক্ষা কৰে ৷ মহিলাগৰাকীৰ বয়স প্ৰায় ৫৬ বছৰ বুলি জানিব পৰা গৈছে ৷ ভিডিঅ’টোত দেখা গৈছে যে কেব চালকে কেনেকৈ খৰধৰকৈ মহিলাগৰাকীৰ চুলিত ধৰিলে, একে সময়তে আৰক্ষীয়ে ৰেলিঙৰ ওপৰেৰে উঠি মহিলাগৰাকীৰ প্ৰাণ ৰক্ষা কৰাৰ আপ্ৰাণ চেষ্টা চলোৱা পৰিলক্ষিত হয় ৷ শেহতীয়াকৈ দেশত প্ৰায়ে বৃদ্ধি পাইছে আত্মহত্যাৰ ঘটনা বৃদ্ধি পাইছে ৷ সেয়ে ইয়াক কেনেকৈ ৰখাব পাৰি সেয়ে বিষয়ে গুৰুত্ব দিয়াটো খুবেই প্ৰয়োজন ৷

আত্মহত্যাৰ ঘটনা কেনেকৈ ৰোধ কৰিব পাৰি ?

আত্মহত্যা এক গুৰুতৰ সামাজিক আৰু মানসিক স্বাস্থ্যজনিত সমস্যা, যিটো আমাৰ সমাজত দিনক দিনে বৃদ্ধি পাইছে ৷ ইয়াক ৰোধ কৰিবলৈ আমি আমাৰ চৌপাশৰ মানুহৰ মানসিক অৱস্থা বুজিবলৈ আৰু তেওঁলোকক সহায় কৰিবলৈ সাজু হোৱা উচিত ৷ আপুনি আপোনাৰ চৌপাশে আত্মহত্যা ৰোধ কৰিবলৈ কিছুমান গুৰুত্বপূৰ্ণ পদক্ষেপ ল’ব পাৰে ৷

১/ সজাগ হৈ থাকক

প্ৰথমে আমি আমাৰ চৌপাশৰ মানুহৰ আচৰণ আৰু মুখৰ ভাবলৈ গুৰুত্ব দিয়া উচিত ৷ যদি কোনো ব্যক্তিক দুখী, হতাশ বা মানসিক চাপত থকা যেন আপুনি প্ৰত্যক্ষ কৰে, তেন্তে তেওঁৰ অনুভৱক আওকাণ নকৰিব ৷ তেওঁৰ সমস্যাবোৰ বুজিবলৈ চেষ্টা কৰক আৰু তেওঁক কথা পতাৰ সুযোগ দিয়ক ৷ যদি কোনো ব্যক্তিয়ে জীৱনৰ প্ৰতি হতাশ হৈ আত্মহত্যাৰ সিদ্ধান্ত ল’বলৈ গৈ আছে, তেন্তে ইয়াক গুৰুত্বসহকাৰে লওক ৷ তেওঁ কোৱা কথাবোৰ ভালদৰে শুনিব আৰু তেওঁক সমৰ্থন কৰিবলৈ চেষ্টা কৰক ৷

২/ কথা-বতৰাৰ আৰম্ভণি কৰা

আত্মহত্যাৰ কথা ভাবি থকা ব্যক্তিৰ লগত কথা পতাটো জৰুৰী ৷ তেওঁক পোনপটীয়াকৈ সুধিব যে তেওঁ আত্মহত্যাৰ কথা ভাবিছে নেকি ? এই প্ৰশ্ন কৰিবলৈ আপুনি কোনো ধৰণৰ ভয়-সংকোচ নকৰিব; এনে ধৰণৰ কথা-বতৰা পাতিলে ব্যক্তিগৰাকীয়ে অনুভৱ কৰিব পাৰে যে তেওঁৰ অনুভৱবোৰ বুজিবলৈ চেষ্টা কৰা হৈছে ৷ তেওঁক জনাওক যে তেওঁ অকলশৰীয়া নহয় আৰু তেওঁৰ সমস্যা সমাধান হ’ব পাৰে ৷

৩/ সমৰ্থন আৰু পৰামৰ্শ প্ৰদান কৰা

এজন হতাশগ্ৰস্ত ব্যক্তিক আৱেগিক সহায় দিয়াটো অতি প্ৰয়োজনীয় ৷ তেওঁক বুজাওক যে প্ৰতিটো সমস্যাৰ সমাধান থাকে আৰু তেওঁৰ জীৱনটো কিমান মূল্যৱান সেয়া তেওঁক অনুভৱ কৰাওক ৷ তেওঁৰ লগত সময় কটাওক, তেওঁক ইতিবাচক কামত জড়িত কৰক আৰু তেওঁক জীৱনৰ ভাল কথাবোৰৰ কথা সোঁৱৰাই দিয়ক ৷ যদি ব্যক্তিজনে অকলশৰীয়া অনুভৱ কৰিছে তেন্তে তেওঁক এয়া আশ্বাস দিয়ক যে আপুনি তেওঁক সহায় কৰিবলৈ সদায় আছে ৷

৪/ আৰ্থিক সহায়

বহু সময়ত আৰ্থিক অভাৱত মানুহে আত্মহত্যাৰ পথ বাছি লয়, এনে পৰিস্থিতিত আপুনি এনে ব্যক্তিক যিমান পাৰে আৰ্থিকভাৱে সহায় কৰাটো গুৰুত্বপূৰ্ণ ৷ আপোনাৰ ফালৰ পৰা অলপ আৰ্থিক সাহায্যই কাৰোবাৰ জীৱন ৰক্ষা কৰিব পাৰে ৷ বিশেষকৈ বন্ধু-বান্ধৱ আৰু আত্মীয়ৰ প্ৰতি আপোনাৰ দায়িত্ব গুৰুত্বপূৰ্ণ হৈ পৰে ৷

৫/ সামাজিক সহায়

প্ৰায়ে আমি দেখিবলৈ পাওঁ কোনো কোনো কামত বিফলতাৰ বাবে এজন ব্যক্তিয়ে নিজৰ জীৱন শেষ কৰিবলৈ চেষ্টা কৰে ৷ এনে পৰিস্থিতিত বন্ধু-বান্ধৱী, পৰিয়াল আৰু সমাজৰ দায়িত্ব তেওঁক সমৰ্থন কৰি বুজাই দিয়া যে এটা বিফলতাই তেওঁৰ ভাগ্য সলনি কৰিব নোৱাৰে, জীৱনত সফল হোৱাৰ তেওঁ বহুতো সুযোগ লাভ কৰিব ৷

সতৰ্কীকৰণ: প্ৰিয় পাঠক, আমাৰ প্ৰতিবেদন পঢ়াৰ বাবে ধন্যবাদ ৷ এই খবৰটো কেৱল আপোনালোকক সজাগ কৰাৰ উদ্দেশ্যে লিখা হৈছে ৷ আমি এই প্ৰতিবেদনত সাধাৰণ তথ্যৰ সহায় লৈছো ৷ কিন্তু প্ৰিয় পাঠক, যদি আপুনি যিকোনো স্বাস্থ্যৰ সৈতে জড়িত কিবা প্ৰতিবেদন পঢ়ে, তেন্তে তাত উল্লেখিত পৰামৰ্শ বা উপায় গ্ৰহণ কৰাৰ পূৰ্বে নিশ্চিতভাৱে বিশেষজ্ঞৰ পৰামৰ্শ ল’বলৈ নাপাহৰিব ৷

(যদি আপোনাৰ মনলৈ আত্মহত্যাৰ চিন্তা আহিছে বা আপুনি কোনো বন্ধুৰ বাবে চিন্তিত বা আপোনাক আৱেগিক সমৰ্থনৰ প্ৰয়োজন হৈছে, তেন্তে স্নেহা ফাউণ্ডেশ্যনলৈ ফোন কৰক – ০৪৪২৪৬৪০০৫০ (২৪x৭ উপলব্ধ) বা আইকল, টাটা ইনষ্টিটিউট অৱ ছ’চিয়েল চায়েন্স হেল্পলাইন – ৯১৫২৯৮৭৮২১ (সোমবাৰৰ পৰা শনিবাৰলৈ পুৱা ৮ বজাৰ পৰা নিশা ১০ বজালৈ উপলব্ধ ।)

লগতে পঢ়ক:সঁচাকৈয়ে ৰবটে আত্মহত্যা কৰিব পাৰেনে ? - robot suicide in south korea