অভিনেতা মিথুন চক্ৰৱৰ্তীলৈ সন্মানীয় দাদা চাহেব ফাল্কে বঁটা - Mithun Chakraborty Dadasaheb Phalke

Actor Mithun Chakraborty : দাদা চাহেব ফাল্কে ছিলেকশ্যন জুৰীয়ে ভাৰতীয় চলচ্চিত্ৰ জগতলৈ তেওঁৰ অৱদানৰ বাবে অভিনেতা মিথুন চক্ৰৱৰ্তীক এই বঁটাৰে সন্মানিত কৰাৰ সিদ্ধান্ত লৈছে ৷

চিটাৰা ডেস্ক, 30 ছেপ্টেম্বৰ : বলীউডলৈ সুখবৰ ৷ এক দীঘলীয়া সময়জুৰি দৰ্শকক মনোৰঞ্জন দিয়াৰ লগতে নিজৰ বলিষ্ঠ কৰ্মদক্ষতাৰে চলচ্চিত্ৰ জগতখনক সবল কৰি ৰখা অভিনেতা মিথুন চক্ৰৱৰ্তীলৈ বিশিষ্ট সন্মান ৷ দাদা চাহেব ফাল্কে বঁটাৰে সন্মানিত কৰা হ’ব অভিনেতাজনক ৷ 8 অক্টোবৰত 70 সংখ্যক ৰাষ্ট্ৰীয় চলচ্চিত্ৰ বঁটা মহোৎসৱত এই বঁটা প্ৰদান কৰা হ’ব তেওঁক ৷ ইউনিয়ন মন্ত্ৰী অশ্বিনী বৈষ্ণৱে এই কথা এক্সত উল্লেখ কৰে ৷

প্ৰবীণ অভিনেতাৰ পৰা ৰাজনীতিবিদ হৈ পৰা মিথুন চক্ৰৱৰ্তীয়ে লাভ কৰিবলৈ সাজু হৈছে সন্মানীয় দাদা চাহেব ফাল্কে বঁটা । কেন্দ্ৰীয় ৰে’লৱে, তথ্য আৰু সম্প্ৰচাৰ, ইলেক্ট্ৰনিকছ আৰু আই টি মন্ত্ৰী অশ্বিনী বৈষ্ণৱে এই ৰোমাঞ্চকৰ খবৰটো এক্সত শ্বেয়াৰ কৰে । তেওঁ আলোকপাত কৰে যে প্ৰবীণ অভিনেতাগৰাকীক তেওঁৰ ব্যতিক্ৰমী চিনেমা যাত্ৰা আৰু ভাৰতীয় চিনেমালৈ উল্লেখযোগ্য অৱদানৰ বাবে সন্মানিত কৰা হৈছে ।

“ছবি জগতত মিথুন দাৰ প্ৰেৰণাদায়ক যাত্ৰাই প্ৰজন্মক প্ৰেৰণা দিয়ে ! মই ঘোষণা কৰি সন্মানিত হৈছো যে দাদা চাহেব ফাল্কে বাছনি জুৰীয়ে কিংবদন্তি অভিনেতা শ্ৰী মিথুন চক্ৰৱৰ্তী জীক এই আইকনিক স্বীকৃতিৰ বাবে নিৰ্বাচন কৰিছে ।’-বৈষ্ণৱে এইদৰে উল্লেখ কৰে ।

লক্ষণীয়ভাৱে, 74 বছৰীয়া মিথুন চক্ৰৱৰ্তীয়ে প্ৰসিদ্ধ চলচ্চিত্ৰ নিৰ্মাতা মৃনাল সেনৰ 1976 চনৰ কালজয়ী চিনেমা মৃগয়াৰ সৈতে অভিনয় যাত্ৰা আৰম্ভ কৰিছিল, যাৰ বাবে তেওঁ শ্ৰেষ্ঠ অভিনেতাৰ ৰাষ্ট্ৰীয় চলচ্চিত্ৰ বঁটা লাভ কৰিছিল । প্ৰবীণ অভিনেতাজন ডিস্কো ডান্সাৰ, কচম পেইদা কৰ্ণে ৱালে কি, কমাণ্ডো, ওএমজি: ও মাই গডৰ দৰে আৰু বহুতো চলচ্চিত্ৰত তেওঁৰ মন পৰশা অভিনয়ৰ বাবে বিখ্যাত ।

লগতে পঢ়ক :মণিৰত্নমৰ চৰণ স্পৰ্শ কৰি প্ৰশংসিত ঐশ্বৰ্য ৰায় - Aishwarya touches Mani Ratnam feet