নিউজ ডেস্ক, ২৫ছেপ্টেম্বৰ: চিকিৎসা বিজ্ঞানৰ স্নাতক আৰু স্নাতকোত্তৰ মহলাত অধ্যয়ন কৰা ছাত্ৰ-ছাত্ৰীয়ে এতিয়া নামভৰ্তিৰ সময়ত ১৫ ৰ পৰা ২০ লাখ টকাৰ বণ্ড দিব লাগিব । পঢ়া-শুনা সম্পূৰ্ণ কৰাৰ পিছত চিকিৎসালয়ত জুনিয়ৰ ৰেচিডেণ্ট (জে আৰ) আৰু ছিনিয়ৰ ৰেচিডেণ্ট (এছ আৰ) চিকিৎসক হিচাপে এবছৰ কাম কৰিব লাগিব । যিসকল ছাত্ৰ-ছাত্ৰীয়ে পাঠ্যক্ৰম (এমবিবিএছ বা পি জি) সম্পূৰ্ণ কৰাৰ পিছত এবছৰলৈকে চিকিৎসালয়ত সেৱা আগবঢ়াব নিবিচাৰে, তেওঁলোকে বণ্ডৰ ধন দিব লাগিব ।
এই ব্যৱস্থা পৰৱৰ্তী শৈক্ষিক অধিবেশনৰ পৰা সকলো চিকিৎসা মহাবিদ্যালয়ত কাৰ্যকৰী কৰা হ’ব । ইয়াৰ সৈতে জড়িত আদেশ স্বাস্থ্য আৰু পৰিয়াল কল্যাণ বিভাগে উপ-ৰাজ্যপালৰ নিৰ্দেশমৰ্মে জাৰি কৰিছে । অৱশ্যে দিল্লীতহে প্ৰযোজ্য কৰা হৈছে এই নিয়ম ৷
নিৰ্দেশনাটোত কি আছে ?
জাৰি কৰা নিৰ্দেশনাটোত উল্লেখ কৰা হৈছে যে দিল্লীৰ চিকিৎসা প্ৰতিষ্ঠানসমূহত (ইণ্টাৰনশ্বিপৰ সময়সীমাকে ধৰি) পাঠ্যক্ৰম সম্পূৰ্ণ কৰাৰ পিছত সৰ্বভাৰতীয় কোটা আৰু ৰাজ্যিক কোটাৰ স্নাতক আৰু স্নাতকোত্তৰ মহলাৰ চিকিৎসা বিজ্ঞানৰ ছাত্ৰ-ছাত্ৰীসকলৰ বাবে এবছৰীয়া সেৱা বণ্ড প্ৰৱৰ্তনৰ ব্যৱস্থা কৰিছে ৷ যাৰ অধীনত স্নাতক আৰু স্নাতকোত্তৰ (ছুপাৰ-স্পেচিয়েলিটি পাঠ্যক্ৰমকে ধৰি) উত্তীৰ্ণ ছাত্ৰ-ছাত্ৰীয়ে এবছৰৰ বাবে দিল্লী চৰকাৰৰ অধীনত চিকিৎসা প্ৰতিষ্ঠানত বাধ্যতামূলকভাৱে সেৱা আগবঢ়াব লাগিব ।
ব্যৱস্থাটো এনেদৰে ৰূপায়ণ কৰা হ’ব-
স্নাতক আৰু স্নাতকোত্তৰৰ ছাত্ৰ-ছাত্ৰীসকলে নিজ নিজ চিকিৎসা মহাবিদ্যালয়/প্ৰতিষ্ঠানত নামভৰ্তিৰ সময়ত স্নাতক পাঠ্যক্ৰমৰ বাবে ১৫ লাখ আৰু স্নাতকোত্তৰ পাঠ্যক্ৰমৰ বাবে (ছুপাৰ-স্পেচিয়েলিটি পাঠ্যক্ৰমকে ধৰি) ২০ লাখ টকাৰ বণ্ড জমা দিব লাগিব ৷ যদি শিক্ষাৰ্থীগৰাকীয়ে বাধ্যতামূলক সেৱাৰ সময়সীমাৰ পৰা আঁতৰি আহিব বিচাৰে, তেতিয়াহে এই ধন দিব লাগিব । স্নাতক উত্তীৰ্ণ জে আৰ পদৰ বিপৰীতে আৰু স্নাতকোত্তৰ উত্তীৰ্ণ এছ আৰ পদৰ বিপৰীতে সামঞ্জস্য কৰা হ’ব আৰু তেওঁলোকক ছুপাৰ স্পেচিয়েলিটি পাঠ্যক্ৰমৰ ক্ষেত্ৰত উপযুক্ত বৃদ্ধিৰ সৈতে জে আৰ এছ/এছ আৰক দিয়া পাৰিতোষিকৰ সমান ধন প্ৰদান কৰা হ’ব ।