নিউজ ডেস্ক, 25 জুলাই : বৃহস্পতিবাৰে শিক্ষয়িত্ৰীৰ ৰূপত দেখা গ’ল ৰাষ্ট্ৰপতি দ্ৰৌপদী মুৰ্মুক ৷ দিল্লীস্থ ৰাষ্ট্ৰপতি ভৱন চৌহদৰ ৰাজেন্দ্ৰ প্ৰসাদ কেন্দ্ৰীয় বিদ্যালয়ত এটা দিনৰ বাবে শিক্ষয়িত্ৰী হ’ল দেশৰ প্ৰথম নাগৰিক ৷ কেন্দ্ৰীয় বিদ্যালয়খনৰ নৱম শ্ৰেণীৰ ছাত্ৰ-ছাত্ৰীসকলক গোলকীয় উষ্ণতা বৃদ্ধিৰ লগতে পৰিৱেশ সংৰক্ষণ সন্দৰ্ভত পাঠদান কৰে শিক্ষয়িত্ৰীৰূপী মুৰ্মুৱে ৷
উল্লেখ্য যে ৰাষ্ট্ৰপতি হিচাবে আজি দুটা বছৰ সম্পূৰ্ণ কৰিলে দ্ৰৌপদী মুৰ্মুৱে ৷ বিশেষ দিনটো নিজৰ ভাললগা কামেৰে অধিক বিশেষ কৰি স্মৰণীয় কৰাৰ উদ্দেশ্যে ৰাষ্ট্ৰপতিগৰাকীয়ে বিদ্যালয়খনৰ ছাত্ৰ-ছাত্ৰীসকলৰ লগত আন শিক্ষক-শিক্ষয়িত্ৰীৰ দৰেই সময় অতিবাহিত কৰি পাঠদান কৰে ৷ উল্লেখ কৰিব লাগিব যে 1994ৰ পৰা 1997 চনলৈকে শিক্ষকতা কৰিছিল দ্ৰোপদী মুৰ্মুৱে ৷
ওড়িশাৰ শ্ৰী অৰবিন্দ ইণ্টিগ্ৰেল এডুকেশ্বন এণ্ড ৰিচাৰ্চ চেণ্টাৰত শিক্ষকতা কৰিছিল দেশৰ 15 সংখ্যক ৰাষ্ট্ৰপতিগৰাকীয়ে ৷ উক্ত শৈক্ষিক প্ৰতিষ্ঠানখনত দ্ৰৌপদী মুৰ্মুৱে হিন্দী, ওড়িয়া, গণিত আৰু ভূগোলৰ পাঠদান কৰিছিল ৷ ছাত্ৰ-ছাত্ৰীক শিক্ষা প্ৰদান কৰি ভালপোৱা দেশৰ ৰাষ্ট্ৰপতিগৰাকীয়ে সেয়ে তেখেতৰ দুবছৰীয়া কাৰ্যকালৰ বিশেষ দিনটোত দিল্লীৰ ৰাজেন্দ্ৰ প্ৰসাদ কেন্দ্ৰীয় বিদ্যালয়ত শিক্ষকতা কৰি দিনটো স্মৰণীয় কৰি তোলে ৷