নিউজ ডেস্ক, ২২ মে' : আম আদমী পাৰ্টীৰ (আপ) সাংসদ স্বাতী মালিৱাল তেওঁৰ ওপৰত হোৱা আক্ৰমণ সন্দৰ্ভত বুধবাৰে পুনৰ সৰৱ হয় । তেওঁ কয় যে মুখ্যমন্ত্ৰী অৰবিন্দ কেজৰিৱালৰ সহযোগী বৈভৱ কুমাৰৰ বিৰুদ্ধে তেওঁক আক্ৰমণৰ যি অভিযোগ কৰিছিল সেয়া ভিত্তিহীন বুলি খাৰিজ কৰাৰ বাবে দলৰ নেতাসকলেই এতিয়া উঠি-পৰি লাগিছে । তেওঁ নিজৰ দলৰ ওপৰত এক নতুন আক্ৰমণ চলাই দাবী কৰে যে আপে 'গুণ্ডাৰ হেঁচাত' সেও মানিছে আৰু এতিয়া তেওঁৰ চৰিত্ৰৰ ওপৰত প্ৰশ্ন উত্থাপন কৰিছে ।
"কালি মই দলৰ এগৰাকী জ্যেষ্ঠ নেতাৰ পৰা ফোন পাইছিলোঁ । তেওঁ মোক কৈছিল কেনেকৈ সকলোৰে ওপৰত যথেষ্ট চাপ সৃষ্টি কৰা হৈছে । তেওঁলোকক স্বাতীৰ বিৰুদ্ধে লেতেৰা কথা ক'বলৈ, তেওঁৰ ব্যক্তিগত ফটো ফাদিল কৰি তেওঁক মানসিকভাৱে হাৰাশাস্তি কৰিবলৈ কোৱা হৈছে । এইটোও কোৱা হৈছে যে যিয়ে তেওঁক সমৰ্থন কৰে তেওঁক দলৰ পৰা বহিষ্কাৰ কৰা হ'ব । ইয়াৰ বাবে কাৰোবাক সংবাদমেল সম্বোধনৰ দায়িত্ব দিয়া হৈছে আৰু আন কাৰোবাক টুইট কৰাৰ দায়িত্ব দিয়া হৈছে ।" এক্সৰ এটা পোষ্টত স্বাতী মালিৱালে কয় ।
"কাৰোবাৰ কৰ্তব্য হৈছে আমেৰিকাত বহি থকা স্বেচ্ছাসেৱকসকলক ফোন কৰা আৰু মোৰ বিৰুদ্ধে কিবা এটা উলিয়াই দিয়া । অভিযুক্তৰ নিকট সান্নিধ্যত থকা কিছু লোক আকৌ সাংবাদিকৰ কিছুমান ভুৱা ষ্টিং অপাৰেচন প্ৰস্তুত কৰাৰ কৰ্তব্যত নিয়োজিত আছে । আপোনালোকে হাজাৰ হাজাৰ সৈন্য মোৰ বিৰুদ্ধে অৱতীৰ্ণ কৰাব পাৰে, কিন্তু মই অকলে ইয়াৰ সন্মুখীন হ'ম । কিয়নো সত্যটো মোৰ সৈতে আছে । মই তেওঁলোকৰ ওপৰত খং কৰা নাই, কিয়নো অভিযুক্ত এজন অতি শক্তিশালী ব্যক্তি । আনকি ডাঙৰ নেতাসকলেও তেওঁক ভয় কৰে । তেওঁৰ বিৰুদ্ধে থিয় দিবলৈ কাৰো সাহস নাই ।"
"মই দুখিত যে দিল্লীৰ মহিলা মন্ত্ৰীগৰাকীয়ে হাঁহি হাঁহি দলটোৰ এগৰাকী পুৰণি মহিলা সহকৰ্মীৰ চৰিত্ৰক বদনাম কৰিছে । মই মোৰ আত্মসন্মানৰ বাবে যুঁজ আৰম্ভ কৰিছোঁ, মই ন্যায় নোপোৱালৈকে এই যুঁজ অব্যাহত ৰাখিম । এই যুঁজত মই সম্পূৰ্ণ অকলশৰীয়া, কিন্তু মই ইয়াক এৰি নিদিওঁ !" স্বাতীয়ে লগতে কয় ।