ایس ایس اہلووالیہ نے دعوی کیا کہ بھارتی ایئر فورس کی جانب سے پاکستان کے خلاف پاکستان میں گھس کر کیے جانے والا فضائی حملہ صرف اُن کے لیے وارنگ تھی۔ انہوں نے ان تمام میڈیا رپورٹز کو غلط قرار دیا جس میں دعوی کیا جارہا ہے کہ اس حملے میں 300 سے زائد ہلاکتیں ہوئی تھیں۔
ریاست مغربی بنگال میں پریس کانفرنس کے دوران انہوں نے سوالیہ لہجے میں کہا کہ 'کیا وزیراعظم نریندر مودی نے کبھی بھی کہا کہ 300 افراد ہلاک ہوئے ہیں؟ کیا بی جے پی کے کسی ترجمان نے یہ کہا؟ کیا امت شاہ نے ایسا کہا؟
ان کے پریس کانفرنس کا ویڈیو حزب اختلاف کی جماعتوں نے سوشل میڈیا پر شیئر کیا ہے جس میں اہلووالیہ یہ کہتے ہوئے نظر آرہے ہیں کہ ہم انسانوں کی ہلاکت نہیں چاہتے۔
واضح رہے کہ 26 فروری کو مرکزی حکومت نے کہا تھا کہ بھارتی فضائیہ نے بالاکوٹ میں شدت پسند تنظیم جیش محمد کے بڑے کیمپز پر حملہ کیا اور اس آپرین میں بڑی تعداد میں عسکریت پسند ہلاک ہوئے ہیں۔
میڈیا رپورٹز نے نامعلوم سرکاری ذرائع کا حوالہ دیتے ہوئے کہا کہ 300 سے زائد ہلاکت ہوئی ہے۔ بھارتی ایئر فورس نے سرکاری طور پر ہلاکتوں کی تعداد بتانے سے انکار کر دیا اور کہا کہ اس آپریش کے دوران ہوئی ہلاکتوں کی تعداد بتانے میں وقت لگے گا۔
