ترنمول کانگریس کے ایک اور ایم ایل اے بی جے پی میں شامل

ندیا ضلع کے شانتی پور سے رکن اسمبلی ارندم بھٹاچاریہ ترنمول کانگریس کو چھوڑ کر بی جے پی میں شامل ہو گئے۔

مغربی بنگال میں آئندہ ہونے والے اسمبلی انتخابات کے پیش نظر سیاسی سرگرمیاں عروج پر ہے۔ اس دوران دل بدل کا کھیل بھی مسلسل جاری ہے۔

ممتا بنرجی کی تمام تر کوششوں کے باوجود رکن پارلیمان اور رہنماؤں کے پارٹی چھوڑ کر جانے کا سلسلہ رکنے کا نام نہیں لے رہا ہے۔

اس دوران آج ندیا ضلع کے شانتی پور سے رکن اسمبلی ارندم بھٹاچاریہ نے ترنمول کانگریس کو چھوڑ کر بی جے پی کا دامن تھام لیا۔

بی جے پی میں شامل ہونے والے ارندم بھٹا چاریہ بھی دل بدل کے کھیل کے ماہر کھلاڑی ہیں۔ انہیں اس کھیل کا کافی تجربہ ہے۔ اس سے پہلے وہ کانگریس کے ٹکٹ پر انتخاب جیت کر رکن اسمبلی بنے تھے اور اس کے چند ماہ بعد ہی انہوں نے کانگریس چھوڑ کر ترنمول کانگریس میں شمولیت اختیار کرلی تھی اور آج انہوں نے ترنمول کانگریس کو چھوڑ کر بی جے پی کا دامن تھام لیا ہے۔

بی جے پی کے ریاستی انتخابی مشیر کیلاش وجے ورگیہ نے کہا کہ ارندم بھٹاچاریہ ترنمول کانگریس سے ناخوش تھے۔ انہیں کام نہیں کرنے دیا جا رہا تھا۔

انہوں نے کہا کہ رواں ماہ 40 ارکان اسمبلی ترنمول کانگریس کو چھوڑ کر بی جے پی میں شامل ہونے والے ہیں۔