عالیہ یونیورسٹی میں طلبا کی جانب سے متعدد مطالبات کے لیے گزشتہ کئی روز احتجاج جاری ہے۔
اس دوران آج طلبا نے اپنے مطالبات کے پیش نظر وی سی دفتر کا گھیراؤ کیا، جس کے بعد وی سی محمد علی طلبا کے درمیان پہنچے اور کافی دیر تک طلبا کے مختلف مسائل پر بات چیت کی۔ بات چیت کے دوران وی سی نے طلبا کو یقین دہانی کرائی کہ بہت جلد تمام مسائل کا حل نکال لیا جائے گا۔
واضح رہے کہ یونیورسٹی گذشتہ کئی ماہ سے بحران کا شکار ہے۔ یونیورسٹی انتظامیہ اور محکمہ اقلیتی امور و مدرسہ تعلیم کے ساتھ جاری تنازع کی وجہ سے یونیورسٹی کی تعلیمی سرگرمیاں بری طرح متاثر ہوئی ہیں۔
انتظامی امور تعطل کا شکار ہیں اس کی وجہ سے یونیورسٹی کا فنڈ روک دیا گیا ہے۔ مالی و انتظامی امور میں بد انتظامیوں کے انکشاف کے بعد سے محکمہ اقلیتی امور و مدرسہ تعلیم نے یونیورسٹی انتظامیہ کے خلاف جانچ بٹھائی ہے۔
مزید پڑھیں:
وہیں طلبا یونین کے صدر ساجد الرحمٰن نے میڈیا سے گفتگو کرتے ہوئے کہا کہ وی سی نے ہمیں یقین دہانی کرائی ہے کہ بہت جلد تمام مسائل کا حل نکال لیا جائے گا اور اس سلسلے میں آئندہ 8 اکتوبر کو ایک میٹنگ بلائی گئی ہے۔ ساجد الرحمان نے کہا کہ وی سی کی یقین دہانی کے بعد ہم نے آئندہ 8 اکتوبر تک اپنی تحریک کو ملتوی کر دیا ہے۔ آئندہ کا لائحہ عمل وی سی کے جواب کے بعد طے کیا جائے گا۔
