مغربی بنگال کی وزیر اعلی ممتا بنرجی نے چند روز قبل ہی اعلان کیا تھا کہ گریجویشن سے لیکر پوسٹ ڈاکٹریٹ تک کی تعلیم حاصل کرنے والے طلباء کو حکومت کی طرف سے دس لاکھ کا کریڈٹ کارڈ دیا جائے گا۔
آج نبنو میں وزیر اعلی ممتا بنرجی نے اس اسکیم کا افتتاح کیا۔اس کریڈٹ کارڈ کی مدد سے طلباء پیشہ ورانہ کورس کے علاوہ گریجویشن، پوسٹ گریجویشن، پی ڈاکٹریٹ اور پوسٹ ڈاکٹریٹ کے لئے دس لاک تک کا قرض لے سکیں گے۔
اس قرض کے لئے ان کو گارنٹر کی ضرورت نہیں ہوگی ریاستی حکومت ہی گارنٹر ہوگی۔ وزیر اعلی ممتا بنرجی نے کہا کہ اس اسکیم کی شروعات کرنے پر ہمیں فخر ہے۔ انتخابات سے قبل میں نے وعدہ کیا تھا آج وہ وعدہ پورا کیا۔
پورے ملک ہی نہیں پوری دنیا میں طلباء کو دی جانے والی اتنی بڑی پہلی اسکیم ہے۔طلباء اس کارڈ سے ملنے والے قرض کا استعمال اعلی تعلیم، پیشہ ورانہ تعلیم اور بیرون ملک تعلیم حاصل کرنے اور سیول سروس و دیگر مقابلہ جاتی امتحانات کی تیاری کے لئے بھی کر سکیں گے۔
جن کی عمر 40 برس سے کم ہیں وہ اس اسکیم کے لئے موزوں قرار دیئے گئے ہیں۔طلباء اس اسکیم کے لئے آن لائن عرضی دے سکتے ہیں۔انہوں نے کہا کہ والدین کو اب اپنے بچوں کی تعلیم کے لئے فکر مند ہونے کی ضرورت نہیں ہے۔
مزید پڑھیں: طلباء کو 10 لاکھ کا کریڈٹ کارڈ دیا جائے گا: ممتا بنرجی
ہم نے وعدہ کیا تھا اور پورا کیا۔جن لوگوں نے عرضی دے دی ہے ان کو آج ہی کریڈٹ کارڈ مل جائے گا۔انہوں نے طلباء کو آگاہ کیا کہ اس اسکیم کے لئے صرف سرکاری ویب سائیٹس سے ہی عرضی دیں کیونکہ آن لائن جعلسازی بہت زیادہ عام ہو چکی ہے۔
