ترنمول کانگریس کے چار رہنماؤں کی ضمانت کی درخواست پر آج کولکتہ ہائی کورٹ میں جاری بحث بے نتیجہ رہی۔اور آئندہ کل دوپہر ایک بار پھر عرضی پر سماعت ہوگی۔
آج کولکتہ ہائی کورٹ میں ملزمین کے وکیل اور سی بی آئی کے کے وکیلوں کے درمیان ڈھائی گھنٹے تک بحث جاری رہی۔
سی بی آئی نے ملزمین کی ضمانت کی درخواست کی مخالفت کرتے ہوئے کہا یہ ملزمین اثر و رسوخ والے ہیں۔ دوسری جانب سی بی آئی کے وکیل تشار مہتا نے نظام پیلیس کے سامنے ہوئے احتجاج کا حوالہ دیتے ہوئے معاملے کو دوسری ریاست منتقل کرنے کی بھی اپیل کی۔
اس کے علاوہ ممتا بنرجی کے سی بی آئی دفتر میں پہنچ کر احتجاج کرنے اور بنگال کورٹ میں ریاستی وزیر قانون کے موجود ہونے پر سوال اٹھائے۔جس پر دوسرے فریق کی پیروی کر رہے ابھیشیک منو سنگھوی نے کہا کہ ممتا بنرجی گاندھیائی رہنما ہیں انہوں نے اپنے جمہوری حقوق کا استعمال کرتے ہوئے احتجاج کیا ہے۔
نظام پیلیس کے سامنے ہوئے احتجاج کے سلسلے میں انہوں نے کہا کہ ترنمول کانگریس کے رہنماؤں نے اپنے حامیوں کو روکنے کی کوشش کی اور بنگال کورٹ میں ریاستی وزیر قانون کی موجودگی پر جواب دیتے ہوئے ملزمین کے وکیل نے کہا وہ رکن اسمبلی کی حیثیت سے عدالت گئے ہوئے تھے۔
دوسری جانب سی بی آئی نے تمام ملزمین کو جیل میں رکھنے کی اپیل کی۔ ملزمین کے وکیل نے کہا کہ ان کی میڈیکل جانچ کے بعد ہی انہیں اسپتال میں رکھنے کی ہدایت دی۔ انہوں نے کہا کہ ملزمین کی طبعیت خراب ہے۔ اور انہیں بہتر علاج کی سخت ضرورت ہے۔
کولکتہ ہائی کورٹ میں آج بحث مکمل نہیں ہو پائی۔ آئندہ کل ترنمول کانگریس کے رہنما کی ضمانت کی درخواست پر پھر سماعت ہوگی۔
