جنوبی 24 پرگنہ: مٹیا برج میں دوارے سرکار کیمپ کا انعقاد

جنوبی 24 پرگنہ میں واقع نواب واجد علی شاہ کی تاریخی نگری مٹیا برج میں دوارے سرکار کیمپ کا کامیابی کے ساتھ انعقاد کیا گیا۔

مغربی بنگال میں ترقیاتی منصوبوں کو ریاست کے تمام اضلاع تک پہنچانے کے لئے حکومت کی جانب سے دوارے سرکار کیمپ کا انعقاد کیا جارہا ہے۔ ان تمام اسکیمز سے مستفیذ ہونے کے لیے ہزاروں کی تعداد میں خواتین کیمپوں تک پہنچ رہی ہیں۔

اس دوران مغربی بنگال کے مختلف اضلاع کی طرح نواب واجد علی شاہ کی تاریخی نگری مٹیا برج میں دوارے سرکار کیمپ کا آج کامیابی کے ساتھ انعقاد کیا گیا، جہاں ہزاروں کی تعداد میں خواتین پہنچ کر دیگر اسکیمز سے مستفیذ ہوئیں۔ کیمپ کا جائزہ لینے کے لئے آئے ممبران کونسل شمس الزماں انصاری نے ای ٹی وی بھارت سے گفتگو کرتے ہوئے کہا کہ میرے وارڈ میں یہ پہلا دوارے سرکار کیمپ کا اہتمام کیا گیا ہے۔ انہوں نے کہا کہ کیمپ میں تمام تر سہولیات فراہم کرنے کی کوشش کی گئی ہے تاکہ خواتین کو کسی بھی طرح کی کوئی پریشانی پیش نہ آئے، لیکن کیا کریں گرمی اتنی ہے کہ اس سے لڑا نہیں جاسکتا۔

انہوں نے کہا کہ وزیراعلیٰ ممتا بنرجی مختلف ترقیاتی منصوبوں کی بدولت غریب عوام کو مالی طور پر خود مختار بنانے کی کوشش کررہی ہیں اور ہم سب ان کی کوششوں کا ایک حصہ بننے کی کوشش کررہے ہیں۔

شمس الزماں نے بتایا کہ اس کیمپ میں 80 ملازمین خواتین کے ہر مسائل کو حل کرنے کے لئے موجود ہیں۔ ہر سرکاری ملازمین اپنی اپنی ذمہ داریوں کو نبھانے کی کوشش میں مصروف ہیں۔