مودی کی ریلی پر کروڑوں روپے کے اخراجات سے بریگیڈ میدان میں المونیم کے ڈھانچے پر شامیانہ لگایا گیا ہے، اس کے علاوہ سینکڑوں بڑے بڑے اسکرین لگائے گئے ہیں، حزب اختلاف نے اس پر بی جے پی پر تنقید کی ہے۔
سی پی آئی ایم رہنما سوجن چکرورتی نے بی جے پی پر بریگیڈ ریلی میں کئے جارہے اخراجات پر سوال اٹھاتے ہوئے کہا کہ 32 کروڑ کی اخراجات سے بنائے جانے والے شامیانے کے لیے پیسے کہاں سے آئے ہیں۔
انہوں نے مزید کہا کہ بریگیڈ میں پہلی بار شامیانہ لگاکر ریلی منعقد کی جا رہی ہے، کیونکہ بی جے پی کو معلوم ہے کہ بریگیڈ جیسے میدان میں بھیڑ جمع کرنا ان کے بس کی بات نہیں ہے۔ اسی لیے شامیانہ لگایا گیا تا کہ ڈرون کے ذریعہ تصاویر نہ لی جا سکے ورنہ مودی کی ریلی کی قلعی کھل جائے گی۔
وہیں دوسری جانب بی جے پی کا کہنا ہے کہ موسم کے مد نظر شامیانہ لگایا گیا ہے تاکہ بی جے پی کارکنوں کو شدید گرمی سے راحت مل سکے۔
ریلی پر اتنے بڑے پیمانے پر اخراجات کے سلسلے میں بی جے پی کے ریاستی جنرل سیکریٹری راجو بنرجی نے کہا کہ یہ سارے اخراجات پارٹی کے کارکنان کے عطیات سے کیے جا رہے ہیں، اس کے علاوہ انہوں نے دعویٰ کیا ہے کہ ریلی میں 10 لاکھ سے زیادہ لوگ آئیں گے۔
