کلکتہ: تیز گیند باز محمد شامی کو آج عدالت سے راحت مل گئی ہے - وہ سابقہ اہلیہ کی طرف سے دائر مقدمات کی وجہ سے تنائو کا شکار تھے- محمد شامی عدالت میں اپنے بڑے بھائی کے ساتھ پیش ہوئے,جہاں عدالت نے دونوں کی درخواست ضمانت منظور کرلی ۔علی پور کی عدالت نےانھیں عدالت میں پیش ہونے کی ہدایت دی تھی ۔
شامی کے وکیل سلیم رحمان نے کہاکہ ’’شامی اور ان کے بھائی ہاشم عدالت میں پیش ہوئے۔ انہوں نے ضمانت کی درخواست دی۔ عدالت نے وہ درخواست منظور کر لی ہے۔‘‘ سلیم کے علاوہ وکیل نظم عالم سرکار بھی موجود تھے۔
23 اگست کو علی پور کے ایڈیشنل سیشن جج نے حکم دیا تھاکہ حسین کی شکایت کے پیش نظر عدالت کو شامی کو طلب کرنے کے پیچھے کوئی ضروری وجہ نہیں ملی۔ اس لیے اسے عدالت میں پیش ہونے کی ضرورت نہیں ہے۔ تاہم آئندہ 30 دنوں کے اندر ہندوستانی کرکٹر کو اس کیس میں مزید کارروائی کے لیے ٹرائل کورٹ میں درخواست دینی ہوگی۔ اس مدت کے دوران وہ ضمانت کی درخواست دے سکتے ہیں۔ ٹرائل کورٹ ضمانت پر قانون کے مطابق فیصلہ کرے گی۔ اس حکم کے بعد شامی عدالت میں پیش ہوئے۔
2018 میں شامی کی اہلیہ حسین جہاں نے شامی کے خلاف تشدد سمیت کئی مقدمات درج کرائے تھے۔ 2019 میں، علی پور کی ACJM کورٹ نے شامی کے خلاف گرفتاری کا وارنٹ جاری کیاتھا۔ اس کے بعد 9 ستمبر کو علی پور ڈسٹرکٹ سیشن کورٹ نے حکم پر روک لگا دی۔یہ مقدمہ تقریباً چار سال سے وہاں زیر التوا ہے۔ بعد میں حسین جہاں نے کلکتہ ہائی کورٹ سے رجوع کیا اور ڈسٹرکٹ سیشن جج کے حکم کو چیلنج کیا۔ کرکٹر کی اہلیہ سپریم کورٹ گئی تو جسٹس شمپا سرکار نے نچلی عدالت کے حکم کو برقرار رکھا۔ گزشتہ ماہ عدالت عظمیٰ نے کہا تھا کہ سیشن جج کو ایک ماہ کے اندر تمام فریقین کے دلائل سننے کے بعد کیس نمٹانا ہوگا۔ اسی طرح علی پور ڈسٹرکٹ کورٹ میں جولائی کے دوسرے ہفتے سے کیس کی سماعت ہوئی۔ جج نے شامی کو اس کیس کی سماعت میں ذاتی طور پر پیش ہونے کا حکم دیا تھا۔
شامی نے اپنی بیوی کی طرف سے دائر مقدمہ میں پیشگی یا عبوری ضمانت کے لیے درخواست نہیں دی تھی۔ وکلاء کے مطابق انہیں عبوری ضمانت کے لیے ڈسٹرکٹ سیشن جج، ہائی کورٹ یا سپریم کورٹ میں ذاتی طور پر نہیں جانا چاہیے تھا۔ لیکن ٹرائل کورٹ سے ضمانت حاصل کرنے کے لیے اس کے پاس ذاتی طور پر عدالت جانے کے سوا کوئی چارہ نہیں تھا۔ چنانچہ ہندوستانی کرکٹر نے ایشیا کپ کے بعد وطن واپسی پر عدالت میں پیش ہو کر ضمانت حاصل کی ہے۔
یواین آئی
