مغربی بنگال کے ضلع مرشدآباد کے جنگی پور سے ترنمول کانگریس کے امیدوار ذاکر حسین تقریباً 71 ہزار ووٹوں سے آگے چل رہے ہیں۔ اس خبر کے بعد سے مرشدآباد میں ترنمول کانگریس کے حامیوں نے جشن منانے کا سلسلہ شروع کر دیا ہے۔
مغربی بنگال کے تینوں اسمبلی حلقے کولکاتا کے بھوانی پور، مرشدآباد کے شمشیر گنج اور جنگی پور اسمبلی میں ہوئے ضمنی انتخابات کی گنتی جاری ہے۔ مرشدآباد کے دو اسمبلی حلقوں شمشیرگنج اور جنگی پور میں سخت سکیورٹی کے درمیان ووٹوں کی گنتی جاری ہے۔ جنگی پور اسمبلی حلقے سے ترنمول کانگریس کے امیدوار ذاکر حسین اپنے حریف آر ایس پی کے امیدوار جان عالم مشتری سے تقریباً 71 ہزار ووٹوں سے آگے ہیں۔
17 ویں راؤنڈ کے بعد ترنمول کانگریس کے امیدوار کو واضح برتری حاصل ہو چکی ہے۔ دوسری طرف شمشیرگنج سے ترنمول کانگریس کے امیدوار اور سنئیر رہنما امرالاسلام اپنے حریف کانگریس کے امیدوار زاہد الرحمن اور بی جے پی کے امیدوار سے 21 ہزار 918 ووٹوں سے آگے ہیں۔
