مغربی بنگال کے ضلع ہگلی کے شری رام پور سے ترنمول کانگریس کے رکن پارلیمان کلیان بنرجی نے کسان بل عوام مخالف پالیسیوں میں سے ایک قرار دیا ہے۔ انہوں نے کہا کہ کسان بل کے ذریعہ 78 کروڑ لوگوں کے پیٹوں پر لات مارنے کی سازش کی جا رہی ہے۔ اس سے نہ صرف کسانوں بلکہ ملک کے سبھی عام لوگوں کو پریشانیوں کا سامنا کرنا پڑ سکتا ہے۔ اس لئے ایک ایک آدمی سڑک پر اترنے پر مجبور ہو رہا ہے۔
رکن پارلیمان کلیان بنرجی نے کہا کہ بی جے پی کی قیادت والی مرکزی حکومت کو یہ بات سمجھ میں آ چکی ہے کہ کسان بل کے خلاف اٹھنے والی آوازوں کو دبانا مشکل ہی نہیں ناممکن ہے۔
ترنمول کانگریس کے لیڈر نے مرکزی سرکار پر الزام عائد کیا کہ وہ کسان بل کے ذریعہ 78 کروڑ لوگوں کے پیٹ پر لات مارنے کی سازش کر رہی ہے۔ انہوں نے کہا کہ جب اتنی بڑی تعداد میں لوگوں کے بچے بھوک سے بلبلائیں گے تو اس وقت سبھی لوگ سڑکوں پر آجائیں گے۔
کلیان بنرجی نے کہا کہ ملک کی کل 130 کروڑ آبادی میں سے 78 کروڑ لوگوں کو سنبھال پانا بی جے پی کی قیادت والی مرکزی حکومت کے بس کی بات نہیں ہے۔
انہوں نے کہا کہ مطاہرین کے تمام مطالبات جائز ہیں۔ اس معاملے پر سبھی لوگ ایک دوسرے کی حمایت اور مدد کر رہے ہیں تاکہ زرعی قوانین کو رد کیا جا سکے۔ مغربی بنگال کی حکومت اور عوام دونوں کسانوں کے ساتھ کھڑے ہیں۔ آنے والے دنوں میں بنگال میں بھی کسانوں کی حمایت میں بڑے پیمانے پر احتجاجی جلوس کا اہتمام کیا جائے گا۔
کلیان بنرجی مزید کہا کہ بی جے پی کے رہنماوں کے پاس بات کرنے کے لئے کوئی موضوع نہیں ہے اور سچائی پر پردہ ڈالنے کے لئے کبھی شہریت ترمیمی ایکٹ، کبھی لو جہاد، تو کبھی پڑوسی ممالک پر بات کرتے ہیں۔ جب کہ ان ایشوز سے عوام کو کوئی لینا دینا نہیں ہے۔
