میری غربت یوں بے دل بے موت نہ مارے مجھ کو
اے زندگی تو پھر چند اشیا کے دے سہارے مجھ کو
یہ شعر اُتراکھنڈ کے اس شخص پر صادق آتا ہے جو 94 برس کی عمر میں بھی کسی کے سامنے ہاتھ پھیلانے کے بجائے محنت مزدوری کر کے اپنا پیٹ بھرتے ہیں اور اللہ کی رضا پر خوش ہیں۔
کہا جاتا ہے کہ غربت اور مجبوری انسان سے کچھ بھی کروا سکتی لیکن اتراکھنڈ کے 94 سالہ شبیر احمد نے کبھی بھی مجبوری اور غربت کا بہانہ بنا کر دوسروں کے آگے ہاتھ نہیں پھیلایا اور اس عمر میں بھی محنت کر کے اپنا اور اپنی بیوی کا پیٹ پال رہے ہیں۔
شبیر احمد اتراکھنڈ کے ضلع ادھم سنگھ نگر کے باجپور حلقہ اسمبلی میں رہائش پذیر ہیں۔ عمر کے اس مرحلے میں بھی شبیر احمد اللہ پر بھروسہ کرتے ہوئے محنت مزدوری کرتے ہیں۔
شبیر احمد روزی روٹی کے لیے جانوروں کی خوراک فروخت کرتے ہیں جس سے انہیں ماہانہ 4 سے 5 ہزار روپے آمدنی ہوجاتی ہے جسے وہ اللہ کی رضا سمجھ کر قبول کرتے ہیں اور خوشی خوشی زندگی گُزار رہے ہیں۔
ای ٹی وی بھارت سے گفتگو کے دوران 94 سالہ شبیر احمد نے بتایا کہ 'محنت کر کے کھانے میں جو خوشی ملتی ہے وہ بھیک مانگ کر کھانے میں نہیں مل سکتی ہے۔
مہنگائی کے اس دور میں اکثر دیکھا جاتا ہے کہ اچھے خاصے نوجوان افراد بھی بھیک مانگنے لگتے ہیں جبکہ اتراکھنڈ اس بُزرگ نے اپنے ہمت، حوصلے اور اللہ پر بھروسے سے ہر کسی کو متاثر کیا ہے۔
انہوں نے کہا کہ وہ خرابئ صحت کے بعد بھی محنت کرنے کو بھیک مانگنے پر ترجیح دیتے ہیں۔
