چمولی: اتراکھنڈ میں جوشی مٹھ لینڈ سلائیڈنگ سے متاثرہ لوگوں کی بازآبادکاری کے لیے ڈاک میں فیبری کیٹڈ مکانات کی تعمیر کا کام جاری ہے اور اسے تیزی سے مکمل کیا جا رہا ہے۔چمولی کے ضلع ڈیزاسٹر مینجمنٹ آفیسر این کے جوشی نے بتایا کہ سنٹرل بلڈنگ ریسرچ انسٹی ٹیوٹ روڑکی اور آر ڈبلیو ڈی کی نگرانی میں ڈاک میں نشان زدہ زمین کو برابر کرنے کے بعد پلنتھ لیول کا کام جاری ہے۔ یہاں بجلی، پانی، سیوریج وغیرہ کے انتظامات کے لیے بھی کارروائی شروع کر دی گئی ہے۔
چیف ڈیولپمنٹ آفیسر ڈاکٹر للت مشرا نے بتایا کہ شدید اور مکمل طور پر تباہ شدہ عمارتوں ، خصوصی بحالی پیکیج کی پیشگی رقم، سامان کی نقل و حمل اور فوری ضروریات، ایک وقتی خصوصی گرانٹ اور گھریلو اشیاء کی خریداری کے لیے 400.27 لاکھ روپے کی امدادی رقم 623 متاثرہ خاندانوں میں تقسیم کی گئی ہے۔ انہوں نے بتایا کہ 250 متاثرہ خاندانوں کے 902 افراد کو ریلیف کیمپوں میں رکھا گیا ہے۔ راحتی کیمپوں میں متاثرہ لوگوں کو خوراک، پینے کا پانی، ادویات وغیرہ جیسی بنیادی سہولیات مہیا کی جا رہی ہیں۔ ریلیف کیمپوں میں اب تک 1223 افراد کا ہیلتھ چیک اپ کیا جا چکا ہے۔ سردی کی لہر کے پیش نظر ریلیف کیمپوں میں متاثرہ افراد کو ہیٹر، گرم کپڑے، کمبل فراہم کیے جا رہے ہیں۔ عوامی مقامات، چوراہوں اور ریلیف کیمپوں کے آس پاس 20 مقامات پر باقاعدہ الاؤ کا انتظام کیا گیا ہے۔
یہ بھی پڑھیں: Joshimath Crisis جماعت اسلامی کا وفد جوشی مٹھ پہنچا
یواین آئی
