سی بی ایس ای بورڈ کی طرز پر چلتے ہوئے یوگی حکومت نے کورونا وبا کا حوالہ دے کر اترپردیش بورڈ آف سیکنڈری ایجوکیشن کے انٹرمیڈیٹ امتحانات کو رد کرنے کا فیصلہ کیا ہے۔ حکومت اس سے پہلے ہائی اسکول کا امتحان رد کرنے کا اعلان کر چکی ہے۔
نائب وزیراعلیٰ ڈاکٹر دنیش شرما نے جمعرات کو کہا کہ کووڈ-19 کے پھیلنے کے سبب پیدا شدہ غیر معمولی حالات میں طلبہ-اساتذہ کے حق میں اور سیشن بہ ضابطہ کرنے کے پیش نظر حکومت نے سنہ 2021 میں طے شدہ یو پی بورڈ آف سکینڈری ایجوکیشن کی 12 ویں جماعت کے بورڈ کے امتحانات رد کر دیے ہیں۔
انہوں نے کہا کہ طلبہ کو نمبر دیے جانے کا فارمولہ حتمی نہیں ہے‘ اس بابت ایڈیشنل سکیرٹری-سکینڈری ایجوکیشن ارادھنا شکلا کی صدارت میں ایک کمیٹی تشکیل دی گئی ہے جس کی سفارشات کی بنیاد پر امیدوار طلبہ کو نمبرات دیے جانے کا حتمی فیصلہ کیا جائے گا۔
یہ بھی پڑیں: مظفرنگر: مسلم سماج میں ویکیسن کی اہمیت پر شعور بیدار کرنے کی اپیل
انہوں نے کہا کہ سیکنڈری ایجوکیشن محکمہ نے امتحانات کی تیاریاں مکمل کر لی تھیں مگر طلبہ اور اساتذہ کی صحت کی حفاظت کی ترجیح کے پیش نظر ہائی اسکول کے امتحانات پہلے رد کیے گئے تھے اور آج انٹرمیڈیٹ کے امتحانات بھی رد کرکے طلبہ کو ترقی دینے کا اہم فیصلہ کیا گیا ہے۔ اس فیصلے سے ہائی اسکول کے 29.94 لاکھ اور انٹرمیڈیٹ کے 26.10 لاکھ طلبہ مستفیض ہوں گے۔
یو این آئی
