ریاست اترپردیش کے ضلع علی گڑھ میں واقع معروف علی گڑھ مسلم یونیورسٹی آج موسم سرما کی تعطیلات میں اضافے کے 28 دنوں بعد کھلا تاہم یونیورسٹی کے طلبا و طالبات نے کلاسز کا بائیکاٹ کیا۔
یونیورسٹی انتظامیہ کے پہلے مرحلہ کے تحت آج یونیورسٹی کی فیکلٹی (میڈیسن، یونانی، مینجمنٹ اور انجینئرنگ) موسم سرما کی تعطیلات کے بعد دوبارہ کھلا لیکن یونیورسٹی کے طلباء وطالبات نے کلاسز کا بائیکاٹ کرتے ہوئے یونیورسٹی وائس چانسلر پروفیسر طارق منظور اور رجسٹرار عبدالحمید کے استعفی کا مطالبہ کیا ہے۔
یونیورسٹی طلبہ کا کہنا ہے جب تک وائس چانسلر اور رجسٹرار استعفیٰ نہیں دیں گے ہم لوگ کلاسز کا بائیکاٹ کرتے رہیں گے۔
یونیورسٹی اجمل خاں طبیہ کالج کی ایک طالبہ نے بتایا کہ آج 13جنوری ہے اور کئی دیگر فیکلٹیز کھلنے والی تھیں لیکن تمام طلبہ نے فیصلہ کیا کہ وہ کلاسز میں نہیں جائیں گے اور مکمل طور پر کلاسز کا بائیکاٹ کریں گے۔
انہوں نے کہا کہ طلبہ اس وقت تک کلاسز کا بائیکاٹ کریں گے جب تک وائس چانسلر اور رجسٹرار استعفیٰ نہیں دیتے۔
