مولانا یعثوب عباس نے کہا کہ آر ایس ایس اپنے پرانے ایجنڈے کے تحت ملک میں سی اے اے اور این آر سی جیسے قوانین لے کر سامنے آرہا ہے، مسلمانوں کو پوری طاقت کے ساتھ پر امن طریقے سے اس کے خلاف احتجاج کرنا چاہئے۔
دیوبند کے گاوں تھیتکی میں عیسی رضا کی رہائش گاہ پر میڈیا سے خطاب کر تے ہوئے مولانا یعثوب عباس نے کہا کہ مسلمان ہر گز تشدد نہ کریں کیونکہ تشدد سے کوئی لڑائی نہیں لڑی جاسکتی ہے۔
مولانا نے کہا کہ مسلم طبقہ کے کچھ لوگ بھی اس کی قانون کے حق میں تشہیر کرنے میں مصروف ہیں، ایسے لوگوں کو سمجھایا جائے اور انھیں بتایا جائے کہ یہ قانون انھیں بھی نقصان پہنچائے گا۔
مولانا نے بی جے پی کے ایک رکن پارلیمان کے ذریعہ اسد الدین اویسی کی داڑھی پر دیے گئے متنازعہ بیان کے بارے میں کہا کہ حکومت اس طرح کے معاملات پر خاموش ہے، مذہبی آزادی کو نشانہ بنانے کے لیے صرف مسلم برادری کے افراد ہی کو نشانہ بنایا جاتا ہے کیونکہ یہاں دیگر مذاہب کے لوگ بھی داڑھی رکھتے ہیں، یہ انتہائی افسوسناک ہے اور اس کی شدید مذمت کی جاتی ہے۔
انھوں نے آخر میں یہ بھی کہا کہ بی جے پی کے جس رکن پارلیمان نے یہ بیان دیا ہے ان کی رکنیت ختم کرتے ہوئے ان کے خلاف قانونی کارروائی کی جانی چاہئے۔
