سلطان پور: ریاست اترپردیش کے ضلع سلطان پور کے اکھنڈنگر تھانہ علاقے میں سماجوادی پارٹی (ایس پی) کے رہنما کی اسکارپیو کار کی موٹر سائیکل سے ٹکر ہوگئی، اس درد ناک حادثے میں اعظم گڑھ اور امبیڈکر نگر کے تین افراد کی موت ہوگئی ہے جب کہ اس حادثے میں سات افراد شدید زخمی ہوئے ہیں۔ زخمیوں میں سے پانچ افراد کو میڈیکل کالج امبیڈکر ریفر کیا گیا ہے، ڈی ایم اور ایس پی موقع پر پہنچ گئے ہیں۔ اتوار کو مقامی سماجوادی پارٹی کے رہنما رام سورت پرجاپتی اسکارپیو کار سے بلاک کی طرف آرہے تھے اسی دوران ایک تیز رفتار موٹر سائیکل سامنے سے آکر اسکارپیو سے ٹکرا گئی، اسکارپیور کا ڈرائیور بریک بھی نہیں لگا پایا تھا اسی دوران کئی گاڑیاں ایک کے بعد ایک ٹکراتی چلی گئی، جس کی وجہ سے تین افراد کی موت ہوگئی ہے۔
اس حادثے میں ہلاک ہونے والے دو نوجوانوں کی شناخت، پرویش ساکن پھولپور اور رام آسرے ساکن میرپور کے طور پر ہوئی ہے، ایک دیگر ہلاک ہوا شخص بھی میرپور کا بتایا جارہا ہے۔ لیکن ابھی اس کی شناخت نہیں ہوئی ہے۔ اس حادثے میں سات افراد زخمی ہوئے ہیں انہیں فورا اکھنڈنگر کے ہسپتال میں داخل کرایا گیا، جہاں سے پانچ زخمیوں کی حالت دیکھتے ہوئے ڈاکٹروں نے انہیں امبیڈکر نگر میڈیکل کالج ریفر کردیا ہے۔ اس حادثے کی اطلاع موصول ہوتے ہی سی او کادی پور شیوم مشرا اور کئی تھانوں کی فورسز موقع پر پہنچ گئی، ہلاک ہوئے افراد کی لاشوں کو پوسٹ مارٹم کے لیے بھیج دیا گیا ہے۔ ضلع مجسٹریٹ رویش کمار گپتا نے بتایا کہ گاڑیوں کے تصادم میں تین لوگوں کی موت ہوئی ہے۔ سات زخمیوں کو امبیڈکر نگر ہسپتال بھیجا گیا ہے۔انہوں نے بتایا کہ زخمیوں کے علاج کے لیے ایس ڈی ایم ریونیو ٹیم کو تعینات کر دیا گیا ہے اور پوسٹ مارٹم کی کارروائی کے لیے ہدایات دی گئی ہیں۔
یہ بھی پڑھیں : Woman Drink Acid in Baghpat باغپت میں تیزاب پینے سے شادی شدہ خاتون کی موت
