ریاست اتر پردیش میں آئندہ 2022 اسمبلی انتخابات کی تیاریوں کو لے کر سبھی سیاسی جماعتیں اپنا سیاسی وجود تلاش کرنے میں لگ گئی ہیں۔ وہیں مغربی اتر پردیش میں راشٹریہ لوک دل نے بھی اس کی تیاریاں شروع کردی ہے۔
ضلع میرٹھ میں راشٹریہ لوک دل نے بوتھ سطح سے لے کر سیکٹر اور اسمبلی سطح تک پارٹی کیڈر کو مضبوط کرنے کے لیے جوڑ توڑ کی سیاست شروع کر دی ہے۔
میرٹھ میں آج بی ایس پی اور دیگر سیاسی جماعتوں کے مقامی لیڈران اور کارکنان نے پارٹی چھوڑ کر راشٹریہ لوک دل کا دامن تھام لیا ہے۔
پارٹی نے مغربی اتر پردیش میں ایک بار پھر جاٹ اور مسلم ووٹ بینک کو مضبوط کرنے کی کوششوں کے ساتھ آل انڈیا مجلس اتحاد المسلمین کے اترپردیش میں الیکشن لڑنے کے فیصلے پر اپنے مسلم ووٹ بینک کو بکھرنے سے بچانے کی حکمت عملی پر کام کرنا شروع کردیا ہے۔
یہ بھی پڑھیں: یوپی اسمبلی انتخابات: ایس پی کی چھوٹی پارٹیوں و باغی رہنماؤں پر نظر
مغربی اتر پردیش میں اپنی کھوئی ہوئی سیاسی زمین تلاش رہی راشٹریہ لوک دل کو امید ہے کہ 2022 اسمبلی انتخابات میں ایک بار پھر سے یہاں کی عوام ان کو کامیابی کے مقام تک پہنچانے کا کام کرے گی۔
