ریاست اترپردیش کے رامپور میں آئندہ 21 اکتوبر کو ہونے والے ضمنی انتخابات میں رامپور کی سیٹ پر قبضہ کرنے کے لیے بی جے پی نے اپنی بھرپور طاقت جھونک دی ہے۔
وزیراعلی یوگی آدتیہ ناتھ بھی بی جے پی امیدوار بھارت بھوشن گپتا کی حمایت میں رامپور پہنچے جہاں انہوں نے انتخابی جلسہ کو خطاب کرکے عوام سے ووٹ کی اپیل کی۔ اس موقع پر انہوں نے اپنی حکومت کے کئی منصوبوں کا بھی ذکر کیا۔
انہوں نے کہا کہ 'ان کی حکومت غریبوں اور کسانوں کو خوشحال بنانے کی سمت میں کام کر رہی ہے۔'
اپنے خطاب کے دوران انہوں نے رامپور کے چاقو کی صنعت کا بھی ذکر کیا، انہوں نے کہا کہ 'رامپور کے چاقو کی صنعت کو بھی فروغ دیا جائے گا'۔
انہوں نے طنزیہ انداز میں کہا کہ ابھی رامپور کا چاقو اور تلوار ایسے لوگوں کے ہاتھوں میں ہے جو اس کا ڈر دکھاکر لوگوں کی زمینوں پر قبضے کرتے ہیں، اپنی دہشت دکھاکر لوٹ پاٹ کرتے ہیں۔
یوگی نے اپنے خطاب میں مسلمانوں کو بھی اپنی جانب راغب کرنے کی کوشش کی۔ انہوں نے کہا کہ ہماری حکومت بلا تفریق مذہب و ملت ترقی کے منصوبوں کو عوام تک پہنچانے میں مصروف ہے۔
انتخابی جسلہ سے ریاستی وزیر بلدیو سنگھ اولکھ اور سابق رکن پارلیمان اور اداکارہ جیا پردہ نے بھی خطاب کیا۔
