ریاست اترپردیش کے ضلع ایودھیا میں رام مندر تعمیراتی کمیٹی کے چیئرمین نریپندر مشرا کے دو روزہ دورے کے دوران رام مندر کی تعمیر کے لئے طے کئے گئے کئی اہم منصوبوں کو حتمی شکل دینے کے لئے آج سے 12 ستمبر تک دو روزہ خصوصی اجلاس دہلی میں منعقد کیا جا رہا ہے۔
اس میٹنگ میں رام مندر کی تعمیر کے لئے سرکاری ورکنگ اتھارٹی ایل اینڈ ٹی کے سینئر عہدیداران آئی آئی ٹی چنئی کے تکنیکی ماہرین اور بلڈنگ ریسرچ انسٹی ٹیوٹ روڑکی کے تکنیکی ماہرین شامل ہوں گے۔
ان کے علاوہ رام مندر ٹرسٹ کے بہت سارے اعلی عہدیداران بھی اس اجلاس میں شرکت کریں گے۔
اجلاس کی صدارت رام مندر تعمیراتی کمیٹی کے صدر نریپندر مشرا کریں گے۔
ذرائع کے مطابق 70 ایکڑ کے اس کیمپس میں کس طرح کی تعمیرات کی جائیں گی اور کہاں کون سی عمارت کی تعمیر ہوگی ان امور کو بھی حتمی شکل دی جائے گی۔
اس دو روزہ میٹنگ میں یہ فیصلہ کیا جائے گا کہ رام مندر کا مرکزی دروازہ کہاں ہوگا۔
