مرکزی حکومت اور صوبائی حکومت گاؤں کو شہروں سے جوڑنے کی بات تو کرتے ہی رہتے ہیں۔ لیکن اترپردیش کے وزیر اعلی یوگی آدتیہ ناتھ نے بھی ریاست کی سڑکوں کو درست رکھنے کے لیے کئی بار اعلٰی افسران کو حکم دیا ہے۔ اس کے باوجود زمینی سطح پر صاف طور پر دکھائی دے رہا ہے کہ اعلٰی افسران وزیر اعلی کے حکم کو نظر انداز کر رہے ہیں۔
ہم بات کر رہے ہیں ریاست اترپردیش کے شہر مرادآباد کے تحصیل بلاری کے گاؤں جیت پور پٹی کی۔ جَیت پور پَٹِّی میں شہیدی مسجد کے پاس بہت دنوں سے پانی بھرا ہوا ہے۔ اس مسجد کے سامنے کی سڑک خستہ حالت میں ہے۔ اس خستہ حالت سڑک پر پانی بھرا ہوا ہے۔ پانی کی نکاسی نہ ہونے سے عوام پریشان پریشان ہیں۔
مسجد کے امام شاہد حسین نے ای ٹی وی بھارت سے بات چیت کرتے ہوئے بتایا کہ مسجد کے سامنے گندا پانی بھرا ہونے کی وجہ سے نمازیوں کے کپڑوں پر چھینٹے پڑ جاتے ہیں جس کی وجہ سے نمازیوں کو کافی پریشانی ہوتی ہے۔
یہ بھی پڑھیں: کسان نوریت سنگھ کی شہادت رائیگاں نہیں جائے گی: پرینکا گاندھی
گاؤں کے مقامی عالَم رضا نے بتایا کہ یہ پانی آج سے نہیں کئی ماہ سے سڑک پر جمع ہے۔ اسی سڑک سے ہوکر گاؤں کے لوگ مساجد، بازار کے لیے جاتے ہیں اور اسی سڑک سے ہوکر محرم کا جلوس بھی نکلتا ہے۔ انہوں نے بتایا کہ کئی اعلی افسران سے بات کرنے کے بعد بھی کوئی حل نہیں نکلا۔
مسجد کے مؤذِّن مصطفٰی نے بتایا کہ سڑک پر گندا پانی بھرا رہنے کی وجہ سے گاؤں کے مقامی لوگوں کو بہت زیادہ پریشانیوں کا سامنا کرنا پڑ رہا ہے۔
