میگسیسے ایوارڈ یافتہ سندیپ پانڈے نے کہا ہے کہ گرفتار شخص کے خلاف ناجائز کارروائی کی گئی ہے اور اس کی گرفتاری کے دوران گھر کی عورتوں سے پولیس اور غیر سماجی عناصر نے بدسلوکی بھی کی ہے۔
یہ معاملہ ضلع بارہ بنکی کے اسینی گاؤں کے باہر نصب ڈاکٹر بھیم راؤ امبیڈکر کی مورتی کا ہے۔
گرفتار شخص پونواسی کی بیوی کا دعویٰ ہے کہ ڈاکٹر بی آر امبیڈکرکی مورتی یہاں تقریباً 25 برسوں سے موجود ہے چونکہ غیر سماجی عناصر نے متعدد جگہوں پر بابا صاحب کی مورتی کو نقصان پہنچایا ہے اس لیے وہ لوگ مورتی کی حفاظت کے لیے مورتی کے اوپر چھتری بنوانا چاہ رہے تھے۔
پونواسی کہ بیوی کا الزام ہے کہ گاؤں کے پردھان نے دوسرے لوگوں کی شہہ پر یہاں چھتری بنانے کی مخالفت کی اور لیکھپال کے ذریعہ ان کے شوہر کے خلاف ایف آئی آر کرا دی۔
اس کی بعد سنیچر کی رات میں 11 بجے پولیس ان کے گھر آئی اور رات میں تقریبا ایک بجے اس کے شوہر کو پولیس تھانے لے گئی۔
الزام یہ بھی ہے کہ اس وقت پولیس کے ساتھ چند غیر سماجی عناصر بھی تھے جن کے ساتھ مل کر پولیس نے گھر کی خواتین کے ساتھ بدسلوکی بھی کی۔
یہی وجہ ہے کہ متاثرہ خواتین سندیپ پانڈے کی قیادت میں پولیس اسٹیشن پہنچی اور انصاف کا مطالبہ کیا۔ وہیں اس معاملے میں پولیس نے گاؤں والوں اور سندیپ پانڈے کو یقین دہانی کرائی ہے کہ وہ ان کی تمام پریشانیوں کا حل کر کے انھیں انصاف دلائیں گے۔
