عالمی وبا کورونا وائرس اور لاک ڈاؤن کے درمیان مزدوروں کی نقل مکانی کافی پریشان کن ہے۔ حکومت نے مزدوروں کو بھیجنے کے لیے خصوصی ٹرینیں بھی چلائیں، لیکن ابھی بھی کچھ مزدور مختلف مقامات پر پھنسے ہوئے ہیں۔
اترپردیش کے اوریا میں پھنسے مزدوروں کو ٹرین سے بہار بھیجنے کی تیاری ہے۔ یہ مزدور اوریا میں اینٹ بھٹہ پر کام کرتے ہیں جس کے لیے بھٹہ ایسو سی ایشن کے صدر نے آج پھپھوند ریلوے اسٹیشن کے سپرنٹنڈنٹ سے ملاقات کی۔
ملاقات کے دوران اوریا ایڈیشنل ضلع مجسٹریٹ ایم پی سنگھ ایڈیشنل سپرنٹنڈنٹ پولیس کملیش دکشت موجود رہے۔ ریلوے سپرنٹنڈنٹ ارجن سنگھ نے بھٹہ ایسو سی ایشن کے صدر رویندر سنگھ سے کہا کہ شرائط اور تاریخ طے کرکے کرایہ کے طور پر جمع کروانے والی رقم کو فوری طور پر جمع کروائیں۔
اس ملاقات کے بعد ضلع بھر میں اینٹ بھٹوں پر کام کرنے والے مزدوروں کو ان کے گھر بھیجنے کی تیاری کی جارہی ہے۔ آئندہ 12 جون کو شام کے وقت پھپھوند ریلوے اسٹیشن سے بہار جانے والے 2700 مزدوروں کی فہرست تیار کر آج شام ریلوے سپرنٹنڈنٹ کو سونپ دی جائے گی۔ جس کا کرایہ سات لاکھ روپے ریلوے میں جمع کیا جائےگا۔
