اتر پردیش اسٹیٹ حج کمیٹی کے مطابق سنہ 2021 میں حج بیت اللہ کے سفر پر جانے والوں کی تعداد میں کمی دیکھنے کو مل رہی ہے جبکہ اس سے پہلے بڑی تعداد میں عازمین حج مقدس سفر پر یہاں سے روانہ ہوتے تھے۔ رواں برس یوپی سے صرف 6ہزار 347 لوگوں نے ہی فارم بھرا ہے۔
ای ٹی وی بھارت سے خصوصی بات چیت کے دوران وزیر برائے اقلیتی امور مختار عباس نقوی نے بتایا کہ "ہماری ساری تیاریاں مکمل ہیں لیکن بھارت سے کتنے عازمین حج مقدس سفر پہ جائیں گے اس کا فیصلہ سعودی حکومت کرے گی۔"
مختار عباس نقوی نے کہا کہ' وبائی امراض نے ہم سب کے زندگی کو متاثر کیا ہے۔ کورونا کی وجہ سے گزشتہ سال حج نہیں ہو پایا لیکن رواں سال ہماری پوری تیاری ہے۔ اب سعودی حکومت سے اگریمنٹ ہوگا، اس کے بعد ہی تصویر صاف ہوگی کہ سعودی حکومت بھارت کو کتنا کوٹا دیتی ہے؟
مختار عباس نقوی نے بتایا کہ ایئرلائنز کے ساتھ معاہدہ ہوگیا ہے، آن لائن فارم کی کاروائی جاری ہے، اس کے علاوہ دوسرے انتظامات بھی کئے جا رہے ہیں۔ ہم نے کووڈ پروٹوکول کے مطابق ہدایت پر عمل کیا ہے لیکن سعودی حکومت ہی حج کوٹا طے کرے گی۔
انہوں نے کہا کہ اگر کسی طرح کی کوئی پریشانی پیش آتی ہے تو ایسے حالات میں حج پر نہ جانے والے عازمین کی رقم واپس کر دی جائے گی۔ مختار عباس نقوی نے کہا کہ 'جنہیں مدینہ والے بلائیں گے، وہی حج پر جائیں گے'۔
