نوئیڈا سے مزدوروں کی نقل مکانی کا سلسلہ ختم نہیں ہوا ہے۔ روزگار بند ہونے کے خدشات سے بچے ہوئے مزدوروں نے بھی نقل مکانی شروع کردی ہے۔ یہ وہ مزدور ہیں جنہیں ان لاک ون کے بعد بہت سے کاروبار اور صنعتی اداروں میں نرمی دینے کے بعد امید جگی تھی کہ انہیں روزگار مل جائے گا۔
لیکن کورونا کے بڑھتے معاملات کے پیش نظر حالات مزید پیچیدہ ہوتے جا رہے ہیں۔ ایک تو کورونا کی دہشت ہے دوسرے کاروبار اور صنعتی ادارے دوبارہ بند ہونے کے خدشات۔ جس سے تعمیراتی کام رک جائیں گے، بازار اور دیگر روز گار بند ہوجائیں گے تو یہ روز کمانے اور روز کھانے والے لوگ کیا کریں گے۔
ان کے پاس جمع پونجی بھی نہیں رہی جس کی بنیاد پر حالات سے سمجھوتہ کر کے مزید انتظار کریں۔ اس لیے بڑی تعداد میں مزدوروں نے اپنے آبائی وطن کی جانب لوٹنا شروع کردیا ہے۔
ان میں اکثر کا تعلق مشرقی یوپی کے مہوبہ، جھانسی اور دیگر علاقے سے ہے۔ نوئیڈا میں باٹنیکل گارڈن کے سامنے ایسے لوگوں کی بہت بڑی تعداد بسوں اور گاڑیوں کا انتظار کرتے ہوئے دیکھی گئی۔
مزدوروں کا کہنا ہے کہ کہیں کام بھی نہیں ہے اور جو کام کروا رہا ہے وہ پیسے بھی نہیں دے رہا ہے۔ ایسے میں ہم رک کر کیا کریں گے۔
