ریاست اترپردیش کے ضلع ہردوئی میں کانگریس پارٹی کے درجنوں کارکنان نے ضلع دفتر سے کلکٹریٹ دفتر تک حکومت کے خلاف نعرے بازی کرتے ہوئے احتجاج کیا۔
اس موقع پر کانگریس پارٹی کے ضلعی صدر جیو سنگھ نے کہا ہے کہ 'جس طرح سبزیوں اور خصوصا پیاز کی قیمتیں آسمان چھو رہے ہیں، ایسے میں غریب افراد کے لیے سبزی کھانا بھی مشکل ہو جائے گا'۔
انہوں نے مزید کہا کہ 'حکومت بڑے بڑے وعدے تو ضرور کر رہی ہے لیکن ایک مفلس طبقہ آج بھی روٹیوں کا محتاج ہے'۔
کانگریس صدر نے الزام عائد کرتے ہوئے کہا کہ '15 روپیے میں فروخت ہونے والی پیاز 60 اور 80 روپیے میں فروخت ہو رہی ہے'۔
'مہنگائی کم کرنے کا وعدہ کرنے والی بی جے پی حکومت اب مہنگائی پر لگام لگانے میں ناکام ثابت ہورہی ہے'۔
انہوں نے کہا کہ 'جب تک یہ پیاز کسانوں کے پاس تھیں تب تک قیمتیں کم تھیں لیکن بچولیوں کے پاس آنے کے بعد قیمتوں میں اضافہ ہوگیا ہے'۔
اس کے علاوہ کانگریس صدر نے منافع خوروں پر کارروائی کی مانگ بھی کی ہے، اور اپنا شکایتیں خط سٹی مجسٹریٹ کو سونپ دیا ہے۔
