میرٹھ کے فرحت علی جو نہ صرف عوام کو کورونا انفیکشن سے بچانے کے لیے کورونا ویکسینیشن کے لئے لوگوں کو بیدار کر رہے ہیں بلکہ عالمی سطح پر بھی انسانی زندگیوں کو بچانے کے لیے ملک بھر میں گھوم کر انسانیت کا پیغام دینے کا بھی جذبہ رکھتے ہیں۔
فرحت علی رات کو ایک نجی اسپتال میں چوکیداری کے فرائض کو انجام دینے کے بعد دن بھر عوام کے بیچ جا کر ان سے کورونا ٹیکہ لگوانے کی اپیل کر رہے ہیں۔
ان کہنا ہے کہ شمشان گھاٹوں اور قبرستانوں میں لاشوں کے ڈھیر کو دیکھ کر ان کے من میں بھی انسانی زندگی کو بچانے کا جذبہ پیدا ہوا اور یہی وجہ ہے کہ قریب دو ماہ سے شہر کے مختلف علاقوں، گلی اور محلوں میں گھوم کر بغیر کسی اجرت کے لوگوں سے کو رونا کا ٹیکہ لگوانے کی اپیل کر رہے ہیں تاکہ کورونا سے انسانی زندگیوں کو بچایا جا سکے۔
میرٹھ میں کورونا ٹیکہ کاری مہم کو کامیاب بنانے کے لیے عوام کو بیدار کر رہے فرحت علی کے جذبہ کو دیکھ کر اب سماجی تنظیموں کے ذمہ داران بھی ان کے اس کام کی نہ صرف تعریف کر رہے ہیں بلکہ ان کو ہر ممکن مدد پہنچانے کی بات بھی کہہ رہے ہیں۔
مزید پڑھیں:
دنیا میں کورونا متاثرین کی تعداد 17.91 کروڑ سے تجاوز
فرحت علی
میرٹھ میں 21 جون سے 18 سال کے اوپر کے نوجوانوں کو بنا کسی رجسٹریشن کے کورونا ویکسین لگوانے کی شروعات کے بعد سے عوام کو ویکسینیشن کے لیے بیدار کرنے کی مہم بھی جاری ہے۔ ایسے میں فرحت علی جس طرح سے شہر کے مختلف علاقوں میں جا کر نوجوانوں اور بزرگوں سے کورونا ٹیکہ لگوانے کی اپیل کر رہے ہیں وہ قابل ستائش ہے۔
