اردو پڑھاؤ تحریک کے روح رواں اور معروف مصنف ڈاکٹر شکیل احمد کا کہنا ہے ان کی کوشش ہے کہ طلبا اردو پڑھیں، لکھیں اور اردو زبان میں آداب گفتگو سے واقف ہوں۔
انہوں نے مزید کہا کہ کسی زبان کا رسم الخط اس کی روح ہے۔ رسم الخط کے بغیر زبان کا وجود باقی نہیں رہے گا۔ اس لیے ضروری ہے کہ اردو کی بقا اور نشونما کے لیے رسم الخط اردو میں ہی ہو۔
انہوں نے کہا کہ واٹس ایپ اور سوشل میڈیا پر اردو زبان کو ہندی یا رومن رسم الخط لکھنا مناسب نہیں ہے۔ اس تحریک کا مقصد سوشل میڈیا پلیٹ فارم پر اردو زبان کو اس کے اصلی رسم الخط میں پیش کرنے کے لیے عملی اقدام اٹھانا اور حوصلہ افزائی کرنا بھی شامل ہے۔
ڈاکٹر شکیل کی مختلف موضوعات پر نصف سے زیادہ تصانیف منظر عام پر آچکی ہیں۔ مئو کے مختلف تعلیمی اداروں میں اپنی تحریک کے لیے وہ ہمیشہ کوشاں رہتے ہیں۔ اسکولوں میں اردو زبان کی بنیادی معلومات فراہم کرانے اور طلبا میں اردو کو عام فہم کرنے کے لیے ڈاکٹر شکیل احمد ہر ممکن کوشش کر رہے ہیں۔
اردو ادب میں بہترین خدمات کے سبب انہیں آل انڈیا میر اکیڈمی اور اترپردیش اردو اکیڈمی ایوارڈ سے بھی نوازا جا چکا ہے۔
