نوئیڈا: کورونا و دیگر بیماریوں سے تحفظ کے لیے بیداری مہم

نوئیڈا میں کورونا اسٹرین کے کیسز کے بعد سے انتظامیہ اور محکمہ صحت الرٹ ہو گیا ہے۔ انتظامی سطح پر اس سے بچاؤ اور تحفظ کے لیے مختلف اقدامات اٹھائے جارہے ہیں۔ اس تناظر میں محکمہ کے افسران مختلف ذرائع سے وسیع پیمانے پر بیداری پروگرام انجام دے رہے ہیں۔

خاص کر دیہی علاقوں میں لوگوں کو باخبر رہنے اور احتیاط برتنے کی خصوصی توجہ دی جا رہی ہے۔ ضلع پنچایت راج آفیسر کنور سنگھ یادو اور ان کے محکمہ صفائی کی ٹیم کے ذریعہ بلاک دادری کے تحت شاہ پور خورد گاؤں میں منادی کے ذریعے پورے گاؤں میں وسیع تشہیر اور بیداری عمل کو یقینی بنایا گیا ہے۔

اس سلسلے میں چیف ڈیولپمنٹ آفیسر انیل کمار سنگھ نے مطلع کیا ہے کہ پنچایت راج محکمہ کے توسط سے ضلع کے تمام دیہی علاقوں میں یہ پروگرام باقاعدگی سے چلایا جارہا ہے اور دیہی عوام کو بیدار کیا جا رہا ہے تاکہ دیہی علاقوں کے تمام باشندوں کو کورونا وائرس کے انفیکشن بچایا جا سکے۔

غورطلب ہے کہ برطانیہ میں دریافت ہونے والی کورونا وائرس کی نئی قسم سرکاروں کے لیے باعث تشویش بنی ہوئی ہے۔ وہیں 8 دسمبر کے بعد سے برطانیہ سے 1600 افراد اتر پردیش پہنچے ہیں۔ ان میں سے 2 افراد میں کورونا وائرس کے انفیکشن کی نئی قسم پائی گئی ہے۔ یو پی کے محکمہء صحت نے اس حوالے سے سختی برتتے ہوئے ہدایت دی ہے کہ اگر برطانیہ سے آنے والے مسافروں کو کورونا وائرس کا انفیکشن ہے تو انہیں گھریلو قرنطینے کی اجازت نہیں دی جائے گی۔