ریاست اترپردیش کانگریس کے صدر اجے کمار للو اور سابق رکن پارلیمان راجیش مشرا کی موجودگی میں لکھنؤ کے پارٹی دفتر میں سنجیو کمار سنگھ نے اپنے ساتھیوں کے ساتھ کانگریس کی رکنیت حاصل کی۔
الہ آباد یونیورسٹی سے طلبا رہنما کی حیثیت سے سیاست کی شروعات کرنے والے سنجیو سنگھ، عام آدمی پارٹی کے بانی ممبر رہے ہیں اور انہوں نے پوروانچل کی کئی تحریکوں کی قیادت بھی کی ہے۔
اس موقع پر للو نے کہا کہ پوری ریاست میں یوگی حکومت کی عوام مخالف پالیسیوں کی وجہ سے عوام پریشان ہیں۔ کرائم اور بدعنوانی اپنے عروج پر ہے۔ کانگریس جنرل سکریٹری پرینکا گاندھی واڈرا کی قیادت میں بی جے پی کی عوام مخالف پالیسیوں کے خلاف لڑائی لڑی جارہی ہے۔ سنجیو کمار سنگھ جیسا نوجوان اور محنتی رہنماؤں کے کانگریس میں شمولیت سے ہماری جدوجہد کو مضبوطی فراہم ہوگی۔
اس موقع پر سنجیو سنگھ نے کہا کہ کانگریس پارٹی کی پالیسیوں اور نظریات سے متأثر ہو کر انہوں نے پارٹی کی رکنیت حاصل کی ہے۔
محترمہ واڈرا اور للو کی قیادت میں سڑکوں پر ایک بہتر سماج اور ملک بنانے اور ہر ناانصافی کے خلاف لڑائی لڑی جارہی ہے۔ عام آدمی پارٹی اپنے سوراج اور اندرونی جمہوریت کے نظریہ کو چھوڑ چکی ہے۔
