شہر کے وارڈ نمبر 20 سانگور علاقے کے لوگوں نے آج مقامی کاؤنسلر جگدیش کمار بھاردواج کی سربراہی میں محکمۂ جل شکتی کے خلاف زور دار احتجاج کیا۔ اس موقع پر مقامی لوگوں نے اپنے مطالبات کے حق میں نعرے بازی کی اور محکمۂ جل شکتی کے خلاف ناراضگی ظاہر کی۔
اس موقع پر معلومات دیتے ہوئے مقامی کونسلر جگدیش کمار بھاردواج نے بتایا کہ 'وارڈ نمبر 20 کے لوگوں کو گذشتہ 15 دنوں سے پینے کے لیے صاف پانی کا انتظام نہیں ہے۔ اس سلسلے میں انہوں نے محکمہ کو آگاہ کیا لیکن 15 دن گزر جانے کے باوجود آج تک محکمہ کی جانب سے پائپ کی مرمت نہیں ہوئی جس کی وجہ سے مقامی لوگوں کو کافی پریشانیوں کا سامنا کرنا پڑ رہا ہے'۔
کونسلر نے بتایا کہ 'انہوں نے اس مسئلے کے بارے میں محکمہ کے ایگزیکٹیو آفیسرز، اے ای ای، جے ای اور لائن مین سے بات کی لیکن انہوں نے کوئی کارروائی نہیں کی جس کی وجہ سے انہیں آج مقامی لوگوں کے ساتھ احتجاج کرنا پڑا۔'
انہوں نے کہا کہ وہ جب محکمہ کے عہدیداروں کے پاس جاتے ہیں تو وہ کہتے ہیں کہ پائلٹ پروجیکٹ کے تحت ہمارے پاس مناسب افرادی قوت موجود نہیں ہے جس کی وجہ سے یہ کام نہیں ہو سکتا ہے۔
بھاردواج نے کہا کہ اگر ان کے پاس افرادی قوت نہیں ہے تو وہ دفتر میں بیٹھ کر کیا کر رہے ہیں۔ انہوں نے ضلع انتظامیہ اور محکمہ سے مطالبہ کیا کہ بڑے پائپ سے نکلنے والے پانی کو ترجیحی بنیادوں پر بند کیا جائے اور لوگوں کو پینے کے لیے پانی دیا جائے۔ انہوں نے محکمہ کو متنبہ کیا کہ اگر ان کے مطالبات کو پورا نہیں کیا گیا تو آنے والے دنوں میں ان کا مظاہرہ سخت ہوجائے گا جس کی ذمہ داری محکمہ پر ہوگی۔
